– Dekkskift har neste vorte ein vitskap

– Me byrja med dekkhotell for fire år sidan. Den første tida var det god plass. Sidan har etterspurnaden eksplodert. No har me nesten tre hundre sett med dekk på hotellet, fortel Arvid Ove Vikør, dagleg leiar i Kvam Auto AS.

Han trur det er fleire årsaker til utviklinga. Ei av dei er at store bilar treng store dekk. Og store dekk treng mykje plass.

– Fleire kvemmingar har flytta inn i leilegheiter dei siste åra. I ei leilegheit er det gjerne mindre plass til lagring enn i ein einebustad, seier Vikør.

– Ikkje berre pensjonistar

Også etterspurnaden etter dekkskift har auka.

– Tidlegare var det helst eldre personar som kom til verkstaden når dei skulle leggja om til vinterdekk. No har me kundar i alle aldrar, seier Vikør.

Dei fleste verkstader som tilbyr dekkhotell i Kvam, har dekkskift inkludert i prisen. Om ein tek med både hotellkundane og dei som lagrar dekka andre stader, trur Vikør verkstaden legg om kring fire hundre dekk kvar haust. Kvar vår kjem det ein ny runde.

Vikør trur dette òg skuldast tyngdekrafta.

– Store bilar er tunge og vanskelege å jekka opp. Dekka til dei største bilane veg godt over 30 kilo. Mange tykkjer det er vanskeleg å buksera tunge dekk rundt i tronge garasjar, seier han.

Bilane har ikkje berre vorte tyngre, men også meir komplekse.

– Moderne bilar er fulle av teknologi. Mange nye luftfjøra bilar har til dømes eige jekkmodus. Dekkskift har nesten vorte ein liten vitskap, seier han.

– Fleire fallgruver

Vikør har nokre råd til dei som framleis skiftar dekk sjølve. Ein vanleg tabbe er å plassera jekken på feil stad.

– Det er viktig at du finn det rette jekkpunktet for å unngå at bilen vert skadd. På dei fleste bilane er punktet ganske tydeleg. Du finn det også omtala i instruksjonsboka, seier han.

Det er elles viktig å etterstramma boltane skikkeleg, slik at dei ikkje losnar medan ein køyrer.

– Eg vil eigentleg tilrå at ein skaffar seg ein såkalla momentnøkkel. Den gjev frå seg eit klikk når ein har teita hardt nok, seier Vikør.

Brukar du elektrisk muttertrekkjar må du for all del bruka pipe med rett storleik.

– Gjer du ikkje det kan du fort enda opp med å «runda» boltane. Då må me sveisa mutrar på boltane for å klara å skrua dei ut. Det kan fort verta dyrt, seier Vikør.

Tid for nye dekk?

Vinterdekk skal ha minst tre millimeter djupe spor. Men dette er ikkje det einaste ein må tenkja på.

– Dersom du har piggdekk og mange av piggane manglar, vil det ikkje vera eit effektivt piggdekk lenger, seier han.

Piggfrie vinterdekk må vera relativt nye for å fungera som dei skal.

– Dess eldre dekka er, dess hardare vert gummien. Hard gummi gjev dårleg veggrep. Piggfrie vinterdekk fungerer godt i snitt i tre sesongar. Det skal stå ein produksjonsmånad på alle dekk. På nokre dekk kan den vera vanskeleg å finna, seier Vikør.

Treng du nye vinterdekk, må du velja om du skal kjøpa med eller utan piggar. Piggdekk fører til meir støv og ureining, men er meir effektive på nokre typar føre.

– Eg køyrde piggfritt i ein periode, men har gått attende til piggar. På vinterstid kan det verta svært glatt på sidevegane. Treng du å køyra på småvegar i allslags vêr, er nok piggdekk det beste. Køyrer du mest på hovudvegane, kan piggfritt vera godt nok, seier Vikør.

På Vestlandet kan ein bruka piggdekk mellom 1. november og sundag etter 2. påskedag. Det er ikkje påbode å skifta til vinterdekk, men det er påbode å køyra med dekk som er tilpassa føret.