Dei vert talerøyr for ungdomen

– Eg har alltid vore veldig involvert i elevrådsarbeid og lika å snakka for mi aldersgruppe, seier Djupevåg.

Førre veke vart ho vald til leiar i ungdomsrådet i Kvam. Djupevåg har vore medlem i rådet i tre år, og hadde rolla som nestleiar i fjor. No er ho klar for å ta steget opp.

– Eg får læra meg litt politiske omgrep no i starten, så trur eg det skal gå fint, seier ho.

– Treng betre tilbod

Djupevåg fortel at ho har lært mykje av å vera ein del av ungdomsrådet. Ho tykkjer det både er kjekt og viktig å kjempa for saker som gjeld spesielt ungdomar.

Ei av kampsakene er betre kollektivtilbod. Jenta frå Tørvikbygd har reist mykje med buss opp gjennom åra. Ho meiner at tilbodet er langt frå godt nok i dag. Ifylgje henne går mykje av tida til ungdomane med til planlegging, venting og reising, medan ein får lite tid til å vera saman.

– Sjølv om eg har lappen, er dette ei viktig sak å kjempa for. Det dårlege kollektivtilbodet øydelegg for ungdomar. Det er ikkje så lett for ein ålvikar å møta ein strandberming, seier Djupevåg.

Representerer ungdomen

Malene Utskot er i gang med sitt andre år i ungdomsrådet i Kvam, der ho i år er valt som nestleiar. Ho er også nestleiar i Hardanger og Voss ungdomsråd. Å engasjera seg i råda vil gje mange gode og nyttige erfaringar, meiner ho.

Utskot ynskjer å gjera det ho kan for å hjelpa andre.

– Eg tenkjer ofte: «Er det noko eg kan gjera for å hjelpa?» I råda kan eg seia mine meiningar i tillegg til å vera ein representant for andre ungdomar sine meiningar, seier nestleiaren.

For Utskot er førebygging av utanforskap ei svært viktig sak. Ho fortel at ho vil fremja sosiale tiltak for ungdomar som skal vera for alle.

– Kva tenkjer du om jobben som ventar?

– Eg trur det blir hektisk. Eg veit at det er vanskeleg å få gjennomslag i saker, men eg gler meg til å ta del i arbeidet, seier Utskot.

Felles opplæring

Førre veke hadde det nye ungdomsrådet i Kvam sitt fyrste, formelle møte i rådhuset. Måndag var både medlemane og varamedlemane til stades på Hardangerfjord Hotel i Øystese. Der deltok dei på opplæringskonferansen for ungdomsrådsmedlemar i Hardanger og på Voss.

Representantar for råda til Kvam, Ullensvang, Ulvik, Eidfjord og Voss møtte opp for å få ei innføring i ungdomsrådsarbeid, i tillegg til å verta betre kjende.

Trude Lægreid Rinaldo er konsulent i Hardangerrådet IKS og sekretær for Hardanger og Voss ungdomsråd. Ho fortel at det å skipa til felles arrangement for medlemane i råda er viktig.

– Det skapar samhald og er med på å byggja bruer mellom ungdomane og dei ulike råda, seier ho.

På programmet stod bli-kjend-leikar og forskjellige gruppearbeid. Svein Olav Langåker, dagleg leiar for Landssamanslutninga av nynorskkommunar og redaktør i Framtida Junior, snakka om møtekultur, deltaking og korleis ungdomar kan bidra til endring, i tillegg til å halda debattkurs.

Å treffa dei andre råda er nyttig og moro, meiner Djupevåg.

– Ein kan læra veldig mykje av dei andre råda og høyra om kva saker som gjeld der dei held til. Me vil også få moglegheit til å hjelpa kvarandre med saker som kan vera vanskelege, seier leiaren i Kvam ungdomsråd.