– Definisjonen på eit muntrasjonsråd

Den eine prisvinnaren har vore ei eldsjel i Kvam heilt sidan ho flytta hit på 60-talet. Ho har vore med i mange lag og organisasjonar, slik som bondelaget på lokalt og nasjonalt plan, Raudekrossen, lokalpolitikken og mykje meir. Og det bør nemnast at ho faktisk var fyrste kvinne i meieristyret i Øystese. I over 20 år har ho vore det ho kallar «do-dame» for idrettslaget, det vil seia at ho har vaska og halde toaletta på Sjusete reine. Ho held heimen sin open, inviterer folk til seg, og ho har delt mykje varme og medkjensle med folk i vanskelege situasjonar. Ho har i si tid invitert bebuarar på Tolo Omsorg på kaffibesøk ein gong i månaden heime hjå seg. Ho har vore med i besøkstenesta i Grannehjelpa saman med den andre prisvinnaren. Dei bakar kaker og er med på tilskipingar av alle slag. I mange år skipa dei til eldrefestar for bebuarar på sjukeheimane. Under arrangement knytte til born og unge har dei vorte observerte som hjelp på kjøkenet med matlaging og -servering, og heilt sikkert meir til! Dei er ja-menneske! Dei to heldt tale i samband med Grannehjelpa sitt 20-årsjubileum, der dei med humor og varme fortalde om si personlege glede ved frivillig arbeid. I 2019 var prisvinnar nummer 1 konferansier på frivilligfesten, då også med lite sjølvhøgtidelegheit, utkledd i rosa parykk og dansande til ABBA, og som alltid sat latteren laust då ho losa oss gjennom eit program som heidra og synte gleda ved frivillig innsats.

Den andre prisvinnaren har vore frivilligvert på Grannelag og vore turleiar i Trakkatrimmen i fleire år. Ho har vore med i styret i Grannehjelpa og har vore vert på kafé sidan byrjinga; fyrst på Toloheimen, så i Gamleskulen og no på Tolo Omsorg. Som vertskap på slike tilskipingar møter ho alltid dei som kjem med eit imøtekomande smil og ei trygg hand. Ho har også gjennom fleire år bidrege i «det stille» med det som me kallar ein-til-ein-hjelp. Ho har til dømes handla matvarer for dei som av ulike grunnar ikkje kjem seg på butikken sjølve, og gjeve tryggleik til dei som treng fylgje i drosje til legebesøk. Ho har vore med på tallause av Grannehjelpa sine arrangement der ho har laga og servert mat, rigga og rydda. Ho har vore med i programkomiteen for Tematreff på internett, og vore ein ambassadør for å få seniorane til å prøva seg på det digitale. Under koronapandemien var ho rask til å melda seg som frivillig vaksinevakt, og gjorde nok vaksineringa til ei tryggare og hyggjelegare oppleving for mange. Men det desse to nok er aller mest kjende for, er all gleda dei har spreidd med song og musikk. Dei har hatt songstunder på Toloheimen og saman med Olaug Dyrkorn på Tolo Omsorg i ei årrekke. Dei to songfuglane, som me kallar dei, har reist rundt i kommunen og hatt songstunder på sjukeheimar, i omsorgsbustader og på ulike arrangement. Ho, altså prisvinnar nummer to, var med i redaksjonen til «Kvammasongen», og saman har dei to «turnert» i kommunen med allsong knytt til dette songheftet.