Debuterer i restaurant- og overnattingsbransjen
Nye krefter styrer Meieriet i Herand. Fredag fekk dei elddåpen då restauranten opna dørene for sesongen.
- Dette vert spanande. Heile familien har vore i arbeid. Me har vaska lokala frå topp til tå. No ser det meste ut til å vera på stell. Me har eit håp om at det skal koma folk, men me kan jo aldri veta, sa dagleg leiar i Kramsjø, Stig Otto Mjelde, då HF snakka med han fredag. Som avisa skreiv i haust, kjøpte Mjelde og kona Therese Aarseth Kramsjø AS for 7,5 millionar kroner. Samstundes tok dei over drifta av pizzarestauranten og kiosken på kaien. Meieriet leiger dei frå Herand bygdelag, medan kiosken vert leigd frå Herand båtlag.
Ville gjera noko anna
Aarseth og Mjelde har bakgrunn frå høvesvis olje- og gassnæringa og finansbransjen. Dei siste åra har dei budd i Bergen. Mjelde fortel at dei har vore på leiting etter noko heilt anna å gjera dei siste ti til femten åra.- I oljebransjen og finansbransjen er livet spanande, men svært hektisk. Me har leita etter ein stad som kan gje oss ein litt annan livsstil, fortel Mjelde.Då dei vart klar over at Kramsjø var til sals, slo dei ikkje til med ein gong.- Kona var litt skeptisk, men i fjor sommar sigla me til Herand. Det var ein nydeleg dag. Sjølv om ingen av oss sa noko, trur eg me begge skjøna at det var her me ville flytta, seier Mjelde.Dei to har korkje erfaring med å driva restaurant eller overnattingsstad. Difor hyrte dei inn dottera Veslemøy Aarseth Mjelde som restaurantsjef og marknadsførar. Ho fortel at ho har økonomiutdanning, men fekk rikeleg med erfaring med å arbeida i restaurant før og under studietida.
- Ingen revolusjon
Sjølv om eigarane og restaurantsjefen er nye, er kokkane dei same som i fjor. Restaurantsjefen fortel at restaurantgjestene ikkje treng frykta store endringar. Menyen vil stort sett innehalda dei same pizzaane som i fjor.Fram til sommaren kjem berre ein kokk til å jobba i Meieriet. Då vil restauranten vera open i helgane og berre servera pizza. Når den andre kokken kjem, vert både menyen og opningstidene utvida. Frå midten av juni og ut august er planen å halda ope kvar dag, samstundes som gjestene kan eta meir enn berre pizza.Når Meieriet går inn i vinterdvalen i år, er usikkert. - Det kjem an på korleis det går, seier restaurantsjefen.Medan pizzarestauranten har vore stengt i vinter, så held overnattingsstaden alltid open. Anlegget har om lag 30 sengeplassar fordelt på 14 rom. Som under den førre eigaren, vert romma berre leigt ut til grupper. Dei mest typiske kundane er grupper som skal nytta skianlegget på Folgefonna.
- Må læra å krypa først
Ekteparet og dottera skal også driva kiosken på kaien. Der vert endringane større enn i Meieriet. - Me har tenkt å utvida tilbodet slik at det vert ein kafé meir enn ein kiosk. Planen er at kiosken skal vera open når Meieriet er stengt og stengt når Meieriet er ope, seier Mjelde.Sjølv om dei nye eigarane har tenkt å følgja i fotspora til dei gamle eigarane det første året, ser dei ikkje bort frå at det vert større endringar i framtida.- Dette er ein ny bransje for oss. Me må læra å krypa før me kan læra å gå. Det første året skal me gjera det meste som forgjengarane. Så skal me analysera og kanskje endra på noko til neste år. Eller kanskje ikkje. Forandring er bra i nokre samanhengar, men ikkje alltid. Ofte er folk opptekne av at ting skal vera slik dei har vore, seier han.
