Datainnbrot hjå Lingalaks

Det opplyser Lingalaks AS i ei pressemelding torsdag ettermiddag.

Verksemda oppdaga innbrotet klokka 13.20. Innbrotet, som starta klokka 10.02, medførte at sensitiv informasjon i interne data hamna i hendene på uvedkomande.

Nærare bestemt er det snakk om personopplysingar som personnummer, namn, e-postadresser og telefonnummer til både tidlegare og noverande tilsette fram til 2021, og kontaktinformasjon til kundar og leverandørar fram til 2021.

Lingalaks har sikra systema og sett i sving eksterne ekspertar for å gå gjennom det som har skjedd, avdekkja omfanget og avgrensa vidare risiko. Hendinga vil verta meld til politiet og varsla til Datatilsynet, og dei personane som kan vera råka, vil verta varsla.

– Me tek dette svært alvorleg og jobbar kontinuerleg for å styrkja våre tryggleikssystem. Me beklagar hendinga og eventuelle ulemper ho har medført, skriv Lingalaks, som lovar å gjera alt for å førebyggja at noko slikt skjer igjen.

Datasystema til oppdrettaren fungerer som dei skal etter innbrotet.