Dårlege massar trugar sansehage
Grunnboring syner dårlege massar der ein sansehage er planlagd utanfor Toloheimen. Det er trist om ein ikkje får prosjektet i gang, synest Gjermund Stuve (Sp).
Masseutskiftingar, omlegging av vatn og avløp og ny prosjektering må til for å realisera vedtaket om ein sansehage. Det kom fram i ei orientering frå rådmann Anita Hesthamar i formannskapsmøtet 1. november.
– Ikkje rette måten
Rådmannen ser trongen for eit uteområde, men trur ikkje løysinga som er planlagd, er den rette måten å gjera det på. Heller ikkje eit alternativt forslag er klart.
– Nett no er me usikre på vegen vidare, opplyste Hesthamar.
Heradsstyret vedtok i samband med budsjettet for 2022 å fullføra prosjektet. Kostnadsoverslaget låg den gongen på vel 1,6 millionar kroner utan moms, og Kvam herad skulle støtta prosjektet med 980.000 lånefinansierte kroner.
Våren 2022 viste nye kalkylar at ramma måtte aukast til tre millionar. Auken vart vedteken i 1. tertial 2022, og grunnundersøkingar vart gjorde våren 2023.
Området inneheld mellom to og tre meter dårlege massar. Dei krev større tiltak ved ei eventuell utbygging.
Ballar på seg
At boringa synte dårlege massar, kom ikkje overraskande på varaordførar Frode Nygård (Frp). Det er ikkje ukjent at det er mykje flytande leire i området, meiner han.
– Eg ser at ting ballar dramatisk og ukontrollert på seg når ein mogleg må gå laus på grunnarbeid av denne storleiken, sa Nygård.
Eit klart politisk signal hadde han ikkje, men Nygård meiner at det er viktig å få ei avklaring. Private midlar står på vent og vil falla vekk om alt stoppar opp, sa han.
Jostein Moldsvor (KrF) uttrykte frustrasjon over tidsbruken i saka. Han sa han kan forstå at det ballar på seg, men ikkje kvifor eit såpass viktig tiltak ikkje vert høgare prioritert.
– Eg har ikkje noko svar på det no, men eg skjønar frustrasjonen, sa rådmannen.
Ordførar Torgeir Næss (Ap) gav uttrykk for at det er eit sterkt tverrpolitisk ynske at administrasjonen kjem med ei ny sak som er i tråd med intensjonen om å betra tilhøva utandørs for demente.
