Det vart rom for konkurranse i hestelaup. Både rammene og dyra var av det oppblåsne slaget.

Dårleg vêr stogga ikkje moroa

Den andre utgåva av Bygdaskoi gjekk føre seg på Kvam ungdomsskule fredag. I år vart arrangementet innandørs på grunn av dårleg vêr.

Journalist
Publisert Sist oppdatert

Planen var å arrangera i parken ved Hardangerbadet, som i fjor. Elendige vêrmeldingar fekk arrangørane til å kunngjera flytting til Øystesehallen, inntil det viste seg at ein sommarleir i volleyball okkuperte hallen. Såleis enda Bygdaskoi på skulen.

Ordførar Torgeir Næss opna festivalen. Han skrytte av arrangøren for å ha flytta arrangementet innandørs på kort tid. Næss hylla frivillig dugnadsarbeid og Øystese Kvinne- og Familielag for å stilla opp.

Ordførar Torgeir Næss avslutta opningsinnlegget med ein salutt.

– Alt verdt det

Siriann Lillevik, dagleg leiar i Grannehjelpa, fronta arrangementet på vegner av Ung Fritid Kvam. Bygdaskoi var det aller siste tilbodet i årets utgåve av Ung fritid ferie, der unge kan vera med på ymse gratis aktivitetar som til dømes gatekunst, danse- og skatekurs, paintball og turar på land og sjø.

Lillevik er lukkeleg over at «Bygdaskoi» vart realisert for andre gong. I fjor deltok fleire enn tusen, og det var ein stor suksess, seier Lillevik. I år vart det meir hektisk å få alt klart.

Siriann Lillevik fortalde gjestene om kva som skulle skje i løpet av dagen.

– Eg må få skryta av Ung fritid Kvam, ungdomane, føresette og Øystese Kvinne- og Familielag. Alle har vore med i heile omstillingsprosessen for å få dette til. Alt på programmet vart realisert, utanom trøbåtar og padlebrett. Eg vonar ungane har det kjekt. Då er alt verdt det, fortel Lillevik.

Innhaldsrikt og gratis

Sparebanken Vest løyvde 40.000 kr til festivalen i år. Det var avgjerande for å få til tilstellinga, sa Lillevik.

Hoppeslottet vart sett opp inne i aulaen i staden for ute. Køen minka sjeldan.

Hoppeslott og ein bane med oppblåsbare hestar fekk plass i gymsalen. Aktivitetane fremja stor entusiasme. Éin omgang i hoppeslottet var ikkje tilstrekkeleg for mange av barna. Då stilte dei seg i kø og tok ein ny runde.

Her kunne alle forsyna seg med litt av kvart utan å gjera opp for seg. Popkorn og slush har ein tendens til å vera populære innslag på menyen.

I gangen vart det servert gratis mat og drikke. Popcorn, slush, saft, kaffi og bakst var blant utvalet. Øystese Kvinne- og Familielag bidrog med servering.

Signe Steinstø i Øystese Kvinne- og Familielag bidrog med servering. Stundom var det vanskeleg for barna å velja frå menyen. Då var det godt å få litt hjelp.

Øyvor Lid Mæland (12), Maylinn Hellene Fonneland (12) og Anna Mæland (7) deltok. Øyvor gledde seg til å vera med venene sine. Maylinn såg fram til å sjå på konsert med dei lokale songarane, systrene Jenny og Oline Gjerdevik. Anna venta ivrig på loddtrekkinga. Fem bamsar vart lodda ut.

– Eg håpar på å vinna ein av bamsane, sa Anna.

Frå venstre: Øyvor Lid Mæland, Anna Mæland og Maylinn Hellene Fonneland synest det er stas med Bygdaskoi.

Tivoli-stemninga var etablert. Det lukta popkorn i heile bygget. Ungar gjekk med fjesmåling. Høgtalaranlegget dura på med høgt volum.

Ein konsert med Stig Van Eijk avslutta «festivalen». Van Eijk vann Melodi Grand Prix i 1999. Lillevik fortel at Van Eijk truleg appellerer mest til dei vaksne, men påpeika at Van Eijk òg har barnesongar som kan fengja dei unge.

I år vart det registrert over åtte hundre deltakarar.

– Det er heilt «ko-ko» bra, seier Siriann Lillevik.

Fann ein fyrst rett bygg, var det enkelt å finna inngangsdøra.
frivillighet øystese nyhende kvam herad fritid
Laga med Labrador CMS