– Dårleg korrespondanse med hardangerbussane
– Det er for lenge å venta ved overgangane mellom buss og tog på Voss og Arna.
Det hevdar Oddvar Soldal i eit straumbrev til Skyss og Vy. Han er oppteken av at det vert lagt opp gode tilbod for dei som vil reisa kollektivt utan å bruka fly. Han har òg teke saka opp i eit lesarinnlegg i HF.
Soldal meiner at korrespondansen mellom dei seks daglege avgangane og hardangerbussane varierer frå «totalbom» til «god».
Som døme på dårleg samband nemner han at fyrste buss frå Hardanger er på Arna klokka 6.27, og toget austover går klokka 6.28.
– Det er for knapp tid, skriv Soldal.
Ingen buss frå Kvam til Voss korresponderer med toget, påpeikar han.
– Omsyn til skulestart
Soldal spør kvifor Skyss ikkje oppdaterer rutene samstundes som Vy. Pressekontakt i Skyss, Ingrid Dreyer, svarar i eit straumbrev til HF at det er fordi Skyss må ta omsyn til skulestarten i august.
Åge-Christoffer Lundeby, kommunikasjonssjef i Vy, opplyser i ein e-post at rutene i jarnbanenettet i heile Europa vert justerte i desember. Rutetidene og tilgang til jarnbanenettet vert tildelte før denne endringa.
Soldal etterlyser også gjennomgåande billettar. Dreyer svarar at Skyss har eit billettsamarbeid med Vy. Nokre av billettane til Skyss gjeld på nokre togstrekningar i Vestland. For lengre togreiser utanfor fylket, til dømes til Oslo, må ein kjøpa billett av togoperatøren.
Dreyer påpeikar at Vestland er eit komplekst fylke, der både skulebuss, rutebuss, båt, ferje og tog skal verka saman.
– Skyss vil aldri får dette puslespelet til å gå heilt opp, men er svært oppteken av at det skal vera mogleg å gjennomføra samanhengande reiser, skriv Dreyer.
Busstilbodet til dei 450 skulane i fylket trumfar dei fleste andre rutene, opplyser ho.
Snakkar med Vy
Når Vy endrar togtider i desember, tilpassar Skyss tilbodet så langt det lèt seg gjera. Større endringar er det vanskeleg å få til, fordi dei vil få større ringverknader, skriv Dreyer.
Eit døme er line 925, som er ei av hovudlinene i regionen.
– Lokale busstilbod er mange stader tilpassa denne lina, og det tyder at dersom me endrar på line 925, må me anten endra store delar av busstilbodet midt i skuleåret, eller så vil andre reisande mista korrespondansane, skriv pressekontakten.
– Me tek med oss alle innspel frå kundar undervegs, men me vil ikkje klara å gjera alle til lags, skriv Dreyer.
