Damprosjekt i Ålvik er seinka

I mai 2020 vart det kjent at Statkraft Energi (SE), etter pålegg frå Noregs vassdrags- og energidirektorat (NVE), skal oppgradera dammen i ålvikfjella. Tilstanden til dammen er for dårleg, meiner NVE, som har meldt frå om at det må utførast tiltak innan kort tid.

Om lag 800 meter veg og 2,5 kilometer meter med tunnel er planlagde. Sommaren 2023 sa dåverande prosjektleiar Anders Martin Skaarer at han såg føre seg ein pris på «300 millionar pluss».

NVE ber om uttalar om arealbruk, utføring og avbøtande tiltak som er skildra i detaljplanen.

– Lokale forhold og ny kunnskap om naturmiljøet er relevant, skriv direktoratet.

Mellom andre Kvam herad skal uttala seg om detaljplanen for miljø og landskap. Fristen er 28. juni. Saka vert drøfta av planutvalet onsdag 12. juni, før heradsstyret skal vedta fråsegna 20. juni.

Slik er planane ved Bjølsegrøvatnet

– Neppe for alle

I saksutgreiinga skriv rådmannen at ho ikkje har kommentarar utover at detaljplanen bør seia noko om bruken av vegen og området. Kven skal få tilgang, og korleis? undrar ho.

Det spørsmålet er det ikkje råd å svara på enno, seier prosjektleiar Jørn Fosen Simonsen til HF. Han er ikkje overtydd om at vegen heilt opp vert open for alle. Tunnelen vert nemleg ikkje bygd som ein offentleg vegtunnel, forklarar han. Men at rettshavarar får tilgang, kan nok tenkjast, seier Simonsen. Han kan ikkje seia noko om når bruken av vegen vil vera avklara.

I teikningane i detaljplanen kjem det fram at Statkraft vil arbeida for at «tredjepart» skal ha tilgang til eksisterande eller nytt båtutslepp under mesteparten av byggjeperioden.

Her finn du teikninga av området oppe ved dammen og båtutsleppet. Her er teikning av området ved tunnelinnslaget og massedeponiet.

Veg til Bjølsegrøvatnet var tema også då trallebanen i industribygda vart lagd ned, skriv rådmannen i saksutgreiinga til lokalpolitikarane. Trallebanen vart nytta av dei som hadde hytte i området og til nyttetransport. Ein prosess vart sett i gang med å regulera veg til Dammen, men Statsforvaltaren sette foten ned. Resultatet vart dagens veg frå fylkesvegen til Langhamrane i nærleiken av Heller.

– Kanskje neste år

Planen var i utgangspunktet å utføra arbeidet frå våren 2024 til 2028, men allereie i november i fjor såg SE at det truleg ville verta utsett. Sjølv om detaljplanen er komen på høyring, er det framleis ein veg å gå, opplyser prosjektleiar Simonsen.

– Me håpar å få eit vedtak i saka i sommar, skriv han til HF.

SE ventar òg på handsaming av teknisk plan. Begge planane må vera godkjende av NVE før byggjestart, opplyser Simonsen. Så snart dei er godkjende, startar prosessen med å kontrahera entreprenør og setja ein startdato. Håpet er å koma i gang med bygginga neste år, skriv prosjektleiaren.

Treng dispensasjon

I samband med prosjektet har SE søkt Kvam herad om fleire dispensasjonar. Både byggjegrensa mot vassdrag, byggje- og tiltaksforbodet i landbruks-, natur- og friluftsområde (LNF) og forbodet mot byggje- og anleggsverksemd i sikringssona for nedslagsfelt for drikkevatn vert utfordra. Det er òg søkt om dispensasjon frå LNF-føremålet i reguleringsplanen for Damvegen.

SE meiner at tunnelane vil sikra trygg gjennomføring av anleggsarbeidet og skåna naturen for monalege inngrep. Løysinga vil dessutan sikra varig vegtilkome til damområdet i samband med inspeksjon og vedlikehald, skriv energiselskapet.

NVE skal kontrollera at arbeidet vert gjort i samsvar med konsesjonsvilkår og godkjende planar, og sjå til at anleggsområda vert rydda.

For å få vatn til tunneldrivinga er det planlagt å bora etter vatn i nærleiken av tunnelinnslaget. Om det ikkje gjev nok vatn, er plan B å henta vatn frå Kaldakjelen, som ligg om lag 1,7 kilometer nord i luftline frå tunnelinnslaget. Ein isolert vassleidning vil då verta lagd i terrenget og sidan fjerna når arbeidet er fullført. Straumforsyning skal halda han fri for frost. Vatn til driving av «tunnel 2», vert henta frå Bjølsegrøvatnet.

HF gjer merksam på at redaktør Sigbjørn Linga eig ein fritidsbustad ved Bjølsegrøvatnet. Red.