«Courier» syng på siste verset
Det er ikkje lenger mogleg å sjå seglsluppen «Courier» på fjordoverflata.
Båten har lege delvis synleg i sjøen på Kaldestad. Djupevåg Marine Norheimsund AS eig båten. Lars Ragnvald Djupevåg, dagleg leiar, har jobba med å ta opp restane i sommar. Han har hatt hjelp av bror sin og ein kompis.
– Det er riktig at mykje av det som viste, er teke vekk. Restane ligg på botnen, seier Djupevåg.
Han seier at 70–80 prosent er demontert. Djupevåg skildrar båten som ein natursvamp, fordi han er så makketen.
– Båten er under opphogging. Han vart røska sund med gravemaskin. Mykje er fjerna, men det er litt igjen, seier Djupevåg.
Det ligg nokre ribber att, så ein kan sjå at det er restar av ein båt om ein har god fantasi, fortel han. Planen er at dykkarar skal bidra til å henta opp resten. Det som er brukande, vert til ved, medan restane vert kasta. Mellom anna har Geir Madsen fått ein dekksbjelke.
Neste veke skal opphogginga meldast inn til Norsk Ordinært Skipsregister, seier Djupevåg.
– Det er ei sørgjeleg historie, og no syng båten på siste verset. Det skal verta godt å få avslutta dette, seier Djupevåg.
Meir om historia til «Courier» kan du lesa her:
