Byter hotell ut med båt
Tanja Borge sluttar i jobben som hotelldirektør ved Hardangerfjord Hotel AS. I staden skal ho utvikla destinasjon for The Fjords.
Borge fortel at ho bestemde seg for å takka ja til jobben som destinasjonsutviklar Hardanger for The Fjords i førre veke.
– Det sat langt inne å slutta i jobben som hotelldirektør. Hardangerfjord Hotel er eit fantastisk hotell, med verdas beste team, fortel ho.
Når ho likevel vel å slutta, er det fordi ho tykkjer den nye jobben er full av spanande utfordringar.
– Eg brenn sterkt for å utvikla reiselivet og meiner heile Hardanger har eit vanvitig potensial som er i ferd med å verta utløyst. Eg er veldig oppteken av nettverksbygging og samarbeid mellom reiselivsaktørane, fortel ho.
– Opp- og nedturar
Borge seier tida som hotelldirektør har vore full av oppturar og nedturar.
– Det har vore pandemi, med dei utfordringane den førte med seg. Etter pandemien kom det nye utfordringar i form av til dømes høge straumprisar. Det er ikkje berre enkelt å driva hotell i desse tider, seier ho.
Borge fortel at driftsdirektør Tina Våtvik Olsen i Fjordtind Hotels AS allereie er i gang med å finna ein ny hotelldirektør. Borge trur arvtakaren har gode tider i vente.
– Den som får jobben, er eigentleg veldig heldig. Eg trur verda er i ferd med å koma i balanse, og trur det er mykje kjekt i vente for Hardangerfjord Hotel, seier ho.
Skal lokka turistar
The Fjords driv turistbåtar som går i Nærøyfjorden, Geirangerfjorden og Oslofjorden og den såkalla Siderbåten, som går i Hardangerfjorden.
– I år vert det ein mellombels båt som skal gå i Hardanger. Ein ny båt er under bygging. Til neste år håpar eg den er på plass. Jobben min vert å gjera produktet til The Fjords synleg og få turistane til å strøyma til Hardanger, seier Borge.
Ho skal halda fram i jobben som hotellsjef ut mai, og tek til i den nye jobben 1. juni.
Borge fortel at ho ikkje har planar om å flytta frå Kvam.
– Me trivst veldig godt her, seier ho.
