Låner vekk grunn mot skog for å gje rom for hytte

Som motyting for at dagsturhytta i Jondal vert plassert delvis på privat grunn, får grunneigaren ta ut skog på kommunal grunn.

Plasseringa på Teglhaug vart bestemt allereie i september, men i ettertid har kommunen og grunneigarar i området vore på synfaring.

Jondal idrettslag tok tak i saka og fekk på plass ein avtale med eigaren av det mest nærliggjande området. Grunneigaren aksepterte at ein del av hytta kan liggja på privat grunn, på vilkår av at han får ta ut noko skog til vedhogst på den kommunale eigedomen.

Det er dessutan avklara at idrettslaget skal gjera klar tomta og ta på seg ansvaret for drift av og tilsyn med hytta. Laget var tidleg på banen og har vore ein stor ressurs i arbeidet, ifylgje rådmannen.

Kommunen har tinga eit sanitæranlegg av typen Muldo, som vert drive av kraft frå eit solcellepanel.

Alt går fram av sakspapira til formannskapsmøtet torsdag 3. juni. I møtet skal dei folkevalde gjera siste vedtak om plassering av dei tre hyttene. Dei to andre hamnar ifylgje framlegget i Hovden friluftsområde i Odda og på Stølen ovanfor Lofthus. I både gamle Ullensvang og i gamle Odda kommune er fleire alternativ vurderte og forkasta.

Hyttene vert reiste av Stad Kystbygg AS og skal koma til kommunen med båt kring 13. august. I juni kjem selskapet for å fundamentera.

Ifylgje rådmannen har administrasjonen lagt vekt på at hyttene ikkje skal skapa konflikt og splid. Mellom anna mange involverte partar, jaktterreng og verdfullt landskap har gjort plasseringa krevjande.

— Paradoksalt kan kommunen sin posisjon som vertskap for spektakulære og attraktive friluftsopplevingar også føra til at ein tek atterhald, ettersom presset frå besøkjande har vore klart aukande dei siste åra og spreier seg til nye område. Mange involverte har ytra age for at hytta skal auka presset ytterlegare, noko dei ikkje ynskjer.