– Byråkratisk og tungvint

Det kjem fram i eit innspel til retningslinene, som var på høyring til 15. februar. Kvam INP er mellom få som har sendt innspel. Måndag 5. februar inviterte heradet til «ope kontor», der folk kunne koma innom for å seia kva dei meinte. Ingen dukka opp, opplyser advokatfullmektig og sakshandsamar i Kvam herad, Bente Valland Bovim.

Mellom innspela er ein e-post frå Haytham Sarmadawy (H). Han skriv på vegner av verksemda si, Restaurant og bar drift AS, at verksemda set stor pris på arbeidet som er lagt ned. Det er viktig med føreseielege retningsliner både for arrangørar og innbyggjarar, men ikkje alt er like rimeleg, meiner han.

– Vanskeleg i praksis

I punkt 2.5 står det at arrangørane må tilby alternativ overnatting til dei næraste naboane dersom det er pårekneleg at arrangementet vil medføra mykje støy eller andre ulemper. «Næraste naboar» vil seia dei som har bustad i bygg tilstøytande det aktuelle arrangementsområdet.

Sarmadawy trur kravet vil by på utfordringar. Det vil i mange tilfelle kunna medføra store kostnader, som i verste fall kan føra til avlysingar, skriv restauratøren. Han forstår intensjonen, men fryktar at det i praksis kan verta vanskeleg å gjennomføra og at det kan verka mot føremålet. Sarmadawy føreslår å justera punktet og leggja vekt på dialog og samarbeid framfor automatiske pålegg.

Også styret i Øystese Næringslag har kommentert punktet i sitt innspel. Næringslaget meiner heradet må bruka skjøn og sjå talet på enkeltklagar i forhold til det totale utbytet av arrangementet for lokalsamfunnet. Styret understrekar at mange av arrangementa i Kvam er dugnadsbaserte.

– Eit regelverk som pålegg for mange tunge og byråkratiske reglar, kan i verste fall drepa den allereie tynnslitne dugnadsånda i mange lag og organisasjonar, skriv næringslaget.

Stengde vegar?

Den generelle oppfatninga til Kvam INP er at retningslinene vil motverka satsing på nye arrangement i Kvam. Det verkar som ein måte å auka dei byråkratiske hindringane for spontane og nye aktivitetar på, skriv gruppeleiar Bjarte Helland i innspelet.

Han òg er redd for at det med ein del av punkta vil fylgja for store kostnader. I punkt 1.3 om 17. mai-arrangement står det at «Det skal leggjast særskilt vekt på tiltak knytt til trafikktryggleik ved gjennomføring av 17. mai-tog, herunder tiltak som er eigna for å hindre at køyretøy kan køyra inn i toga eller i folkemengder.» Det vil verta svært kostbart for komiteane i bygdene, trur Helland.

Leiar for 17. mai-komiteen i Norheimsund, Vikøy og Steinsdalen, Sigbjørn Linga, skriv i eit innspel at komiteen åtvarar mot absolutte og ressurskrevjande krav.

– Livet, sjølv det å gå i tog på nasjonaldagen, er jamt over risikabelt. Ein kan umogleg sikra seg mot alt og alle som måtte dukka opp, skriv Linga.

Komiteen nemner òg at eit uturvande skjema-, rapport- og analysevelde kan verka hemmande på rekrutteringa av frivillige.

– Mogleg å handtera

Eit anna krav ved større arrangement er å skriva miljørapport. Rapporten må mellom anna innehalda ei oppsummering av korleis arrangøren har fylgt opp avfallshandtering og skildra eventuelle problemstillingar knytte til temaet.

Helland trur det vil medføra laber interesse for å skapa nye konsept med låg terskel.

– Byråkratisk og tungvint, skriv han.

Kvam INP oppmodar heradet om å trekkja forslaget og jobba meir med det.

– Kan det tenkjast at desse retningslinene vil hindra folk i å arrangera?

– Eg ser at det kan sjå litt mykje ut, men me har ynskt å samla alle pliktene i eitt dokument. Det aller meste under punkt 3, til dømes, er krav som har vore i fleire år og som det har vore mogleg å handtera. Eg trur mange ikkje har vore klar over dei. På mange måtar har me berre forsøkt å setja i system mange av krava som allereie har vore gjeldande, seier sakshandsamar Bovim til HF.

Berre nedbrytbart

Bygdalarm er blant arrangementa som tek i bruk offentlege uterom. I dei føreslegne retningslinene står det at bruk av eingongsartiklar skal avgrensast, og at berre nedbrytbare artiklar er tillatne.

– Vert plastglas forbode?

– Tanken er at ein i utgangspunktet bør bruka nedbrytbart, seier Bovim.

HF har spurt festivalsjef Ida Sørheim korleis Bygdalarm ser føre seg å handtera punktet med tanke på til dømes ølglas. Det skal ikkje verta noko problem, meiner ho. Sørheim fortel at plastglasa som har vore i bruk på Bygdalarm, er både nedbrytbare og med i ei slags panteordning.

– Me leverer inn glasa i posar og får pant for dei, fortel ho.

Eit anna alternativ er å servera drikke i boksar og panta boksane.

Øystese Næringslag oppmodar heradet om å plassera ut tilstrekkeleg med bosdunkar i bygdene. Det hadde vore til stor nytte både til dagleg og ved arrangement, meiner laget.

HF gjer merksam på at leiar i 17. mai-komiteen som er omtala i saka, er bladstyrar i HF. Red.