Byrådet i Bergen kan gå av i løpet av dagen

Det går føre seg ei intens møteverksemd blant partia i Bergen fredag morgon, etter at det i går vart klart at det er fleirtal for mistillit mot byrådsleiaren.

Den politiske krisa i Bergen etter barnevernsbråket vil etter alt å dømme føre til at både byrådsleiar Roger Valhammer (Ap) og byrådet går av i løpet av fredagen.

Torsdag kveld vart det klart at det er fleirtal for mistillit mot Valhammer etter at også Senterpartiet vil støtte mistillitsforslaget. Heile 37 av dei 67 medlemmene i bystyret vil stemme for forslaget. Mistillit mot byrådsleiaren vil føre til at heile byrådet må gå av, ifølgje Bergens Tidende.

Formelt kan ikkje mistillitsforslaget fremjast før neste bystyremøte, 26. oktober. Etter at forslaget er fremja, skal det stemmast over endå ein gong i etterfølgjande bystyremøte, ein månad seinare, men det er svært sannsynleg at Valhammer vel å trekkje seg før den tid.

Då må ordførar Rune Bakervik (Ap) kartleggje eit alternativ til det eksisterande byrådet, noko som kan bli vanskeleg ettersom Høgre ikkje har fleirtal.

Ifølgje Bergensavisen opnar Raudt for eit anna scenario. Dei er nemleg opne for å berre erstatte byrådsleiaren.

– Vi ønskjer ikkje eit Høgre-styrt byråd, situasjonen i bystyret no er at det ikkje er eit fleirtal som vil støtte det. Ikkje berre vil det vere fornuftig, men også forsvarleg av Ap å skifte ut Valhammer, men halde fram som leiande byrådsparti, seier gruppeleiar Mailiss Åkerblom i Raudt.

SV på si side ønskjer å kaste barnevernsbyråd Katrine Nødtvedt (MDG), men ikkje Valhammer.

Bakgrunnen for mistilliten er Statsforvaltarens kraftige kritikk mot det kommunale barnevernet etter fleire alvorlege barnevernssaker den siste tida.

(©NPK)