– Byggjer på manglande forståing
Kvam Næringsråd ber fylkespolitikarar om å skrota forslaget om å leggja ned VG2-tilbodet industriteknologi på Kvam vidaregåande skule frå 2026.
Det kjem fram i eit ope brev til medlemer og varamedlemer i hovudutval for opplæring og kompetanse i Vestland fylkeskommune. Dagleg leiar Hans Jørgen Andersen skriv til dei folkevalde at saka vekkjer uro i næringslivet i Kvam. Verksemdene i Kvam er avhengige av tilbodet, og ei nedlegging vil skada grunnlaget for å driva næring i heradet, meiner Andersen.
– Lokal opplæring og lokalt tilsette gjev konkurransekraft, stabilitet og byggjer lokalsamfunn i vid meining, skriv den daglege leiaren.
På grunn av mangel på kompetanse er i dag fleire av verksemdene i Kvam avhengige av dyrt, innleigt personell frå utlandet i desse faga, meiner han. Lina har hatt få søkjarar i år. Samstundes har skulen tre klassar med 45 elevar totalt på VG1 industriteknologi, påpeikar næringsrådet.
– Forslaget byggjer på manglande forståing for rekrutteringsbehova i regionen, og utgjer ein trussel mot lokalsamfunnet, skriv Andersen.
