Byggjer opp att bryggje, men vil sleppa gebyr

Sakshandsaminga gebyret gjeld, er gjort i samband med ein søknad frå grendeutvalet på Mundheim om å byggja opp att «Holmakaien» ved krysset i Mundheim sentrum. Den naudsynte dispensasjonen for tiltaket i eit friområde på gard nummer 144/1 vart gjeven av planutvalet i juni.

Etter gebyrreglementet skal gebyret dekkja den faktiske kostnaden med det kommunale arbeidet med søknaden.

– Det er vanskeleg å sjå at nærare 30.000 kroner er riktig pris for ei enkel byggjesak, skriv Tveit.

Primært ber utvalet om fritak for heile fakturaen, og sekundært at gebyret for dispensasjonssøknaden vert ettergjeve, slik det er gjort med Sandvenholmen i Norheimsund. Det bør vel vera likehandsaming? spør Tveit.

Stønad til gebyr?

Grendeutvalet er i utgangspunktet eit kommunalt utval, der heradet vedtek reglementet og betalar ut eit årleg tilskot på 5.000 kroner. At utvalet skal verta pålagt eit gebyr på nærare 30.000 kroner for sakshandsaming for å byggja opp att ein kai som ålmenta vil ha nytte av, verkar underleg for utvalet. Kaien vil sikra badefjøra mot båttrafikk og dimed vera eit viktig sikringstiltak for badande, skriv Tveit.

Grendeutvalet står ansvarleg for tiltaket, men manglar pengar til eit så stort gebyr før gjenoppbygginga av kaien kan starta. Utvalet har rett nok fått 20.000 kroner av heradet til nærmiljøtiltak, men synest det er underleg om desse pengane må brukast til å betala kommunale gebyr.

– Pengar til nærmiljøtiltak er vel rekna for å nyttast til sjølve investeringa, skriv Tveit.

Rådmannen har varsla at førespurnaden vil verta handsama etter ferien.

– Berre positivt

Kaien vil verta 27 meter lang. Utvalet fekk 15. juni samrøystes dispensasjon i planutvalet frå mellom anna arealføremål og frå byggjegrensa langs sjøen. Utvalet er samd med rådmannen i at tiltaket vil gje betre og tryggare tilkome for folk flest.

Arealet er i privat eige, men vert forvalta av Bergen og Omland Friluftsråd (BOF). Området har ei langgrunn sandfjøre, grindbygg, grill, bord og benker. BOF har løyvt pengar til bryggjeprosjektet, men har ynskt at grendeutvalet står for søknadene, opplyser utvalet i eit brev til Kvam herad.

Til å hjelpa seg med formalitetane har utvalet engasjert Tore Meidell Mundheim i Norstrand Eiendomsrådgivning AS.

– Berre positivt, sa Geir Madsen (SV) då planutvalet drøfta saka.

– Det er forseggjort og ordentleg og ser veldig bra ut, sa utvalsleiar Ottar Randa (H).

Utvalet ynskte å orientera dei folkevalde om tiltaket, men dette vart droppa for å hindra seinking av prosjektet. I kvammapolitikken godtek ein nemleg ikkje handsaming av saka i same møte som partar i saka får ordet. Med ei orientering i juni hadde ikkje avgjerda vorte teken før i slutten av september.