— Byggjer fiber i Ytre Ålvik

Dagleg leiar Steinar Foss Andersen seier at det er korrekt, som rådmannen nyleg opplyste formannskapet om, at verksemda truleg ikkje får tilskot til å byggja ut i området. Årsaka er at dagens dekning er betre enn kriteria i tilskotsordninga føreset.

Utsiktene er likevel noko lysare enn det rådmannen førespegla. Sjølv utan tilskot vil breibandstilbydaren med base i Norheimsund investera i grenda. Det har styret bestemt. Andersen reknar med at fiberen vil koma på plass i 2022.

Han opplyser at selskapet har hatt seljarar i felten, og at ein god del av innbyggjarane har tinga tenesta.

Om utbygginga lønar seg? Det er ikkje Andersen så sikker på, men han seier selskapet kjenner på ei viss forplikting til å hjelpa innbyggjarar også i mindre folketette område. Årsaka er tilskot frå det offentlege til utbygging, vel å merka ikkje spesifikt til dette prosjektet.

— Me gjer det for å gje folk eit godt tilbod og ei god løysing, seier han.

Andersen fortel at Kvamnet snart skal i gang med fiberutbygging på strekkja frå Torsnes til Hesvik i Ullensvang kommune. Selskapet, Ullensvang kommune og Vestland fylkeskommune spleisar på investeringa. Det nye bakkenettet er for tida under planlegging, og det er søkt om løyve til dei naudsynte stasjonane.