Bygdalarm håpar på stønad
Musikkfestivalen Bygdalarm ynskjer kraftfondshjelp til å verta mellom dei beste og største festivalane i Vestland.
Festivalen har søkt om ein halv million kroner til eit treårig prosjekt. Festivalen er både ein uslipt diamant og ein stadutviklar, særeigen i sin klasse og i landet, heiter det i søknaden.
Det er viktig for festivalen å femna om alle aldersgrupper. Bygdalarm har kontakt med Utekontakten og Ung Fritid i Kvam for å nå unge i alderen 12–18 år. Dei kan delta i organisering og gjennomføring av Badnalarm, som er ein gratiskonsert for familiar.
For å verta oppdaga og sett av eit framtidig publikum, ynsker Bygdalarm å satsa på sosiale medium og marknadsføring. Festivalen ynskjer å rekruttera yngre krefter for at dei skal få tilknyting til festivalen og området. Opplegget skal ta utgangspunkt i måla til Bygdalarm om å fremja tilknyting, fellesskap og dugnadsånd, interesse for musikk og kultur og kjærleik til livet på bygda.
Festivalen har òg søkt Hardangerstiftinga om 500.000 kroner. I tillegg vil festivalen skyta inn 270.500 sjølv. Budsjettet for 2023–2025 vert på 1.270.500 kroner. Bygdalarm søkjer elles Kulturrådet om 400.000 kroner til produksjonskostnader, artistpleie og liknande.
Løn til dagleg leiar dei tre åra vil koma på 600.000 kroner. Løn til marknadsansvarleg vil vera 300.000 kroner i same periode. Kurs og samlingar for frivillige vil kosta 200.000 kroner i perioden, og marknadsføring 50.000 kroner.
Førebuande arbeid, utarbeiding av heimeside og utgifter til datamaskin er eingongskostnader, til saman 120.500 kroner. Lønskostnader, samlingar for frivillige og marknadsføring i tre år kjem på 1.150.000 kroner.
Bygdalarm i 20204 vert den 16. festivalen sidan starten i 2007. Arbeidet med festivalen vert hovudsakleg gjort på dugnad. Frå 1. juni i år er Ida Sørheim tilsett i 40 prosent stilling til å vareta den årlege drifta. Styret har seks medlemer. Festivalen har inga gjeld.
Koronapandemien førte til mykje ekstraarbeid, men festivalen vart arrangert i full skala i 2022 og 2023. Kostnadene har auka, og det førte til at arrangørane måtte setja opp prisar på billettar og varer. Publikumstalet dei siste åra har gått noko ned.
Festivalen i 2024 vil gå føre seg 5.–6. juli.
