Butikk fekk ansiktslyfting til ni millionar
Coop Prix Jondal har hatt stengde dører i nesten ein månad. Torsdag opna butikken att med lokale som har fått ei kraftig overhaling.
Butikksjef Maria Totland fortel at golvet er nytt, lysa er nye, kjøleskapa og frysediskane er nye, og det same er kassane.
– Og så har me ommøblert ein god del. Mange av avdelingane er ikkje der dei var før. Me utnyttar plassen på ein langt betre måte, fortel ho.
Mindre byggjevarer, meir mat
Avdelinga Coop Byggmix Jondal finst ikkje lenger. Det betyr ikkje at butikken ikkje har byggjevarer. Kundane vil framleis finna hyller med verktøy, måling og anna ein treng i heimen.
– Avdelinga er litt mindre enn den gamle Byggmix-avdelinga, men me trur framleis at folk vil finna det dei treng. Den plassen me sparar, fyller me med eit større utval med daglegvarer. Særleg har me fått meir tørrvarar og kjølevarer, fortel butikksjefen.
– Kvifor denne oppgraderinga?
– Eg trur hovudårsaka er at Coop Hordaland tykkjer at me er flinke og ser eit potensial i butikken. Dessutan var tida inne for ei oppgradering. Interiøret byrja verta gamalt, og ein del av utstyret byrja svikta.
Ni millionar kroner
Lise Skarpås er administrerande direktør i Coop Hordaland SA. Ho fortel at arbeidet har kosta om lag ni millionar kroner. Ho er samd med Totland i at butikken trong oppgradering.
Her kan du sjå ein video frå snorklippinga:
– Den var sliten, og eg tykkjer både dei tilsette og kundane våre fortener ein ny og oppgradert butikk. Eg trur også ommøbleringa vil gjera det lettare for kundane å navigera i butikken. Sortimentet er utvida for å vera tilpassa folk sitt handlemønster, seier ho.
– De fryktar ikkje å mista kundar etter at butikken var stengd?
– Det er alltid ein risiko ved å stengja, men eg trur at butikken har vorte så fin at kundane kjem attende. Coop Prix har lojale kundar, og me har sett andre stader at kundane kjem attende etter ei stenging.
