Budsjettlekkasje: Fylkesvegane blir styrkte med 481 millionar kroner

Regjeringa vil ruste opp fylkesvegar over heile landet og foreslår nærare enn halv milliard meir i 2025-budsjettet. Det er ein auke på 11,4 prosent frå i år.

– Veldig mykje av desse pengane går til opprusting og fornying, seier samferdselsminister Jon-Ivar Nygård (Ap) til NTB.

Saman med kommunal- og distriktsminister Erling Sande (Sp) viser han fram ei liste over korleis pengane dryp på alle fylka i landet.

– Ei opptrapping på 11,4 prosent, det er ei solid opptrapping, seier Sande.

Totalt vil regjeringa gi 4,16 milliardar kroner i tilskot til fylkesvegar neste år.

Auka forskjellar

Dei to statsrådane erkjenner at forskjellen i standard på riksvegane og fylkesvegane har auka:

– På positiv side, er jo det fordi vi er gode på å ta vare på riksvegane våre, men vi ser at fylka har utfordringar med å halde vegnettet sitt ved like. Og dei har eit stort vegnett, mykje større vegnett enn det som staten har, seier Sande.

Han seier at dette er ei satsing regjeringa meiner alvor med.

– Pengane går til vedlikehald, det går til rassikring, og det går ikkje minst til tunnelutbetring, der vi står midt oppi ein kjempejobb med å utbetre tunnelane, seier han.

Beredskap

Sist veke kunngjorde samferdselsministeren at også riksvegane skal få meir pengar neste år. Løyvingane til drift og vedlikehald blir auka med 1,1 milliardar kroner, til 10,8 milliardar kroner i budsjettforslaget for 2025.

Nygård understrekar at drifta av fylkesvegane i hovudsak blir finansiert på dei ordinære budsjetta frå fylkeskommunane. I 2023 brukte dei 24,4 milliardar kroner på fylkesveg.

– Med denne satsinga legg vi til rette for at fylkeskommunane kan bruke meir på fylkesveg i 2025. Staten hjelper til fordi vi anerkjenner at fylkeskommunane har utfordringar, seier han.

Nygård fortel at 50 millionar kroner av fylkesveg-pengane, skal gå til ei ny tilskotsordning for 14 bruer som er kritiske for Forsvarets behov.

– Det går rett inn i arbeidet for samfunnstryggleik og beredskap, seier han.

Milliardauke

I forslaget til Nasjonal transportplan for 2025–2026, som kom i vår, gjekk dei inn for at løyvingane til fylkesvegane skulle trappast opp gradvis.

Planen legg opp til ein auke på 1 milliard kroner i årleg gjennomsnitt i første seksårsperiode av planen, samanlikna med 2024-budsjettet.

– No følgjer vi opp det, seier Nygård.

KS har tidlegare sagt at den såkalla fylkesveg-milliarden ikkje er nok, og at det eigentleg trengst dobbelt så mykje.

– Vi veit at dei ville hatt endå meir pengar. Det vi seier no, er at vi leverer på det som er transportplanen vår. Og vi meinte at han var realistisk og noko vi kunne følgje opp. Og det gjer vi no, seier samferdselsministeren.

– Eg trur det blir nøkternt positivt teke imot. Fylka seier dei treng meir midlar. Eg trur dei vil setje pris på at pengane byrjar å komme allereie i neste års budsjett, legg Sande til.

(©NPK)