Bubil køyrde av vegen på Kvamskogen
Ein bubil køyrde av vegen på Kvamskogen tysdag føremiddag.
Det opplyste sentralen på X klokka 10.49. Naudetatane var då på veg til staden.
Ifylgje Vest politidistrikt køyrde ein bubil av fylkesveg 49 i 80-sona ved Kleiva og hamna i ei skråning. 20–30 meter av autovernet er «knekket», melder politiet.
Føraren og passasjeren kom seg ut or bilen og var vakne og medvitne etter hendinga, melde politiet klokka 10.54. Dei to er utanlandske turistar.
Innsatsleiar og politioverbetjent Ann-May Garen ved Kvam politistasjon fortel at bilen kom frå Norheimsund og var på veg mot Bergen. Han kryssa plutseleg over i motgåande felt, reiv med seg autovernet og køyrde utfor skrenten.
Føraren vart send med ambulanse til sjekk på Haukeland universitetssjukehus.
Årsaka til ulukka er ukjend, men det er ikkje mistanke om rus. Føraren av bubilen kan ha vorte uvel. Politiet etterforskar saka.
Det oppstod ikkje problem med trafikkavvikling på ulukkesstaden, ifylgje politiet. Eitt køyrefelt var i ein kort periode stengt.
