Brysamt bos i Kvam

Klagane dreiar seg for det meste om posar med restavfall rundt konteinarar for hytteavfall.

Kommunikasjonsrådgjevar Tina Skudal i BIR seier at det er eit kjent, men ikkje ynskt problem. Ho seier at det interkommunale føretaket berre har ansvaret for handtering av hushaldningsavfall, som vil seia både primær- og sekundærbustad.

Difor har dei eigne returpunkt for hytteavfall som er låste, slik at berre dei med nøkkel har tilgang. Privatpersonar har eigne spann heime til å kasta restavfall i. Om dei har meir enn 140 liter i veka, har dei høve til å kjøpa eigne sekker til restavfall som ein kan setja ved sida av spannet. Ein kan òg levera restavfall utan matavfall i til gjenvinningsstasjonane.

Det er BIR sitt ansvar å halda det ryddig og reint på sine returpunkt, men det er ikkje alltid renovasjonsselskapet har kapasitet til det.

Skudal oppmodar difor folk om å kasta boset der det høyrer heime. Ho minner om at alle som legg til rette for turisme, har ansvar for at dei tilreisande kan kvitta seg med avfall på ein forsvarleg måte i nærområdet.

— Det er ikkje kjekt når dei må bruka avfallsløysingar som ikkje er tilpassa deira behov, seier Skudal.