– Bruk refleksvest og lykt
Vegen mellom Sjusetevegen og Svartabrua i Øystese vert ikkje prioritert med trafikksikringstiltak.
Det skriv rådmannen i svaret på ein søknad frå bebuar Carina Øystese. Ho held til øvst i vegen, og seier det er ynskeleg å få på plass lyktestolpar frå hovudvegen og opp. Grunnen er at vegen har mykje tungtrafikk og born nyttar vegen som skuleveg. Vegen er mørk og skummel, skriv ho.
Trafikksikringsgruppa vurderte innspelet i eit møte før sommarferien, skriv rådmannen. Gruppa forstår at vegen kan opplevast som ikkje forsvarleg sikra, men konkludert med at vegen er brei i dette området. Det er høve til å nytta andre vegar, som snarvegar, sjølv om det truleg heller ikkje er lys på desse stadene, skriv gruppa.
Få personar har vegen som primærveg. Trafikksikringsgruppa meiner difor at tiltak her ikkje kan prioriterast no.
Gruppa oppmodar generelt om å nytta refleksvest og eventuelt hovudlykt langs vegar der det er mørkt, skriv rådmannen.
