– Bruk gangfeltet!
Tilsette på Norheimsund skule ber foreldre fylgja trafikkmønsteret og prata med borna sine om trafikktryggleik.
I ei melding til foreldra fredag 25. august skriv dei tilsette at det er trafikkfarleg når born og vaksne kryssar vegen rett framom og bak bussane på busstoppet. «Bruk gangfeltet!» står det i meldinga. Dessutan bør dei som ikkje skal vera med bussen, gå ned den mellombelse vegen langs bedehuset og nytta gangfeltet der.
Fungerande rektor, Linda Haugland Jondahl, seier til HF at det ikkje har vore spesielle hendingar som har utløyst meldinga, men at det kvar dag vert observert elevar og vaksne som kryssar vegen på feil stad.
– Dei kryssar vegen rett framfor skulebussane. Dette i seg sjølv er alvorleg nok, og det er viktig for skulen at elevane kjem seg trygt til og frå skulen kvar dag, seier Jondahl.
Ho meiner vaksne, både føresette og tilsette på skulen, må vera gode rollemodellar for elevane.
