Brubyggjar talar til Hardangerakademiet
Tyrkisk-danske Özlem Cekic held føredrag om konfliktløysing hjå Hardangerakademiet i Jondal 7. mai.
Det skriv akademiet i ei innbyding. Cekic skal ha ein samtale med meklarane Kjell Ribert og Trond Lexau frå Nordiske Mediatorer.
Arrangementet heiter Bygg bruer – skap samxistens og er eit samarbeid mellom Hardangerakademiet – nordisk senter for fred, utvikling og miljø, Nordiske Mediatorer og Dialogisk Café.
Gjennom åra har dialogarbeidet til Cekic vorte til foreininga Brobyggerne, som utgjer meir enn 8.800 medlemmer. Suksessen hennar handlar om effektiv dialog på tvers av kultur, rase, meiningar og politikk. Cekic har 2,1 millionar visingar på føredragsplattforma TED, og er ein av svært få skandinavar som har halde TED-føredrag i New York. Cekic er utdanna sjukepleiar og var folketingsmedlem i Danmark i 2007–2015.
Hardangerakademiet for fred, utvikling og miljø er ein ideell organisasjon som har halde sommarsymposium i Jondal sidan 2000.
