Braut vasskrav – lovar bot og betring
Vatn sleppte ikkje forbi inntaket ved Tokagjel Kraftverk i slutten av juni. Utbyggjaren testar fleire tiltak for å hindre reprisar.
Arild Alvsåker gjorde Clemens Kraft AS (CK) merksam på den manglande vassføringa 27. juni. Fire dagar tidlegare gjorde han selskapet merksam på at ei nettside viste null slepp av vatn i fleire timar.
I ein e-post til Noregs vassdrags- og energidirektorat (NVE) gjer CK greie for seg. Selskapet vedgår at ved fleire høve i juni har minstevassleppet vore ope i fleire timar etter at kraftverket er stogga. Når sleppet stengjer, tek det nokre timar før vasstanden vert høg nok til å føra til overløp på terskelen.
– Ergo er det eit par timar utan overløp eller minstevasslepp. Dette er noko som skjer når det er lite vatn i elva, skriv CK.
Ifylgje selskapet er det gjort fleire strakstiltak for å hindre reprisar. Høgda for automatisk start og stopp er endra litt, og kan verta justert meir. Dessutan skal leverandøren av kontrollanlegget vurdera om minstevassleppet kan stengjast straks kraftverket stoppar, stoppa automatisk om kraftverket går på minimumslast i meir enn to timar, og justera starteffekten for å redusera vassinntaket når kraftverket startar.
NVE minner i tilbakemelding om krava om minstevassføring, og presiserer at såkalla start- og stoppkøyring av kraftverket ikkje skal førekoma. Når strakstiltaka er testa og avviket eventuelt lukka, skal NVE ha melding.
