Braut seg inn, men stal truleg ingenting

Meldinga om hendinga kom klokka 04.50, melde Vest politidistrikt på Twitter klokka 06.15.

Måndag morgon opplyser apotekar Liv Margit Soldal Lillemoen at det ikkje er teikn til at noko er stole.

– Alt ser ut til å vera som det plar vera. Ingenting er velta, og det er ikkje spor etter innbrotstjuvar i lokalet, seier Lillemoen.

Ho fortel at ho vart vekt av innbrotsalarmen i 04-tida. Apotekaren møtte opp på staden og venta på politiet, som hadde vorte varsla.

Både dørene inn i bygget – Sjøtunet – og dørene til apoteket var brotne opp. Politiet var på staden for å granska åstaden.

Lillemoen fortel at dei tilsette på Boots-apoteket har hatt ekstra fokus på varslingsrutinar og tryggleik, og at innbrotet ikkje var heilt uventa.

– Me har fått nokre hint om at det har vore meir aktivitet og at det skal ha vore innbrot i fleire apotek andre stader den siste tida, forklarar ho.

Ifylgje Lillemoen skal det vera fleire overvakingskamera i området. Ho er spent på kva opptaka vil visa, seier ho.

Apoteket opna til vanleg tid måndag føremiddag.