Bransjen ventar nytt rekordår for norsk frukt

Prognosane viser at det er venta mykje norskprodusert frukt i butikkane denne hausten, og bransjen ventar endå eit rekordår.

– Det er ein rekordstor produksjon med 711 tonn morellar mot 658 tonn i fjor, seier ernæringsrådgivar Iselin Bogstrand Sagen i Opplysningskontoret for frukt og grønt i ei pressemelding.

Ho viser til Grøntprodusentenes samarbeidsråds fruktprognose for hausten.

I fjor var det rekordår for plommer. Denne sesongen er volumet endå større med heile 1713 tonn, ein auke på 19 prosent, ifølgje tal frå haustprognosen.

– På grunn av den varme maimånaden vi hadde får plommene i år ein veldig god smak, og vi kan forvente å finne store og søte plommer frå årets avling, fortel Harald Alvavoll i styringsgruppa for frukt.

Haustinga av plommer starta i slutten av juli og dei vil ein finne i butikken i august og første veka i september. Også dei norske epla og pærene kjem i butikk i september.

(©NPK)