Brannfarleg skrot eller ikkje?

Saka i Båtavika starta allereie i mars 2020. Då tok Strandebarm grendeutval kontakt med Kvam herad etter tips frå uroa naboar, og bad dei rydda opp i industriområdet. Då heradet ikkje svara, kontakta utvalet Bir, som kom på synfaring i juni same året.

På synfaringa registrerte Bir ein gammal båt, forbrenningsrestar, metallskrap og skrot, står det i eit brev til kommunen. Informasjon vart sendt til Kvam herad som grunneigar, og heradet vart bede om å gjennomføra naudsynte tiltak for å få fjerna avfallet.

Eitt år etter meiner naboane at ingenting har skjedd. Det skriv Lene Tørvik, leiar for Strandebarm grendeutval, i ein e-post til Bir i juli i år. Ho skriv også at det er observert det som kan vera brennbart materiale i tankar som ikkje er eigna til slikt.

— Ikkje avfall

Bir tok grep igjen, og var på synfaring att allereie same veka. Då synte det seg at ein stor del av det som er lagra, likevel ikkje er å rekna som avfall. Nokre båtar, til dømes, er ikkje båtvrak. Det er gamle, intakte båtar som med nokre reparasjonar kan setjast på sjøen, skriv Bir i svaret til grendeutvalet. Kvam brann- og redningsteneste har ifylgje Bir bekrefta at oljetankane som vekte uro er godkjende tankar. Men det er òg ting på tomta som openbert er avfall og som bør fjernast.

Bir poengterer i e-posten at sjølv om avfall vert fjerna, vil det framleis vera ei industritomt. Oppbevaring av gamle gjenstandar og bruksgjenstandar er tillate.

Kolbjørn Ljones er dagleg leiar i Hordaland Elektroteknikk AS, som leiger lokale like ved lagringsplassen. Han kjenner ikkje til saka, anna enn at han har observert det som står der. Då HF fortel at Bir meiner båtane kan sjøsetjast med litt reparasjonar, forsikrar han oss om at han sjølv aldri hadde blitt med utpå.

Mykje blest

Bir gjennomførte ei ny synfaring på tomta i slutten av august i år. Heradet stilte opp, men ikkje leigetakaren. Rådgjevar i BIR AS, Zbigniew Nieznalski, skjønar ikkje kvifor saka skapar så mykje merksemd hjå folk.

— Ein del av tinga er openbert avfall, men dette ligg ikkje i turterreng eller liknande. Det er avsidesliggjande, seier Nieznalski.

Jan Tjosås representerte heradet på synfaringa. Tjosås er leiar for næring i Kvam herad.

No ventar heradet på Bir sin rapport frå synfaringa. Tjosås fekk inntrykk av at det ikkje var dramatikk rundt det som var lagra. Han nemner også at dette er eit område folk ikkje ser, med mindre dei tek seg inn i privat område.

Framleis uroa

Jan-Fredrik Paulsen er ein av naboane som er bekymra for brann på næringstomta. I eit svar til Bir skriv han at det er måten det vert lagra på, som uroar han. Han er redd for at ein eventuell brann fort kan spreia seg.

Ei bekymringsmelding om saka vart send frå Bir til Kvam herad 23. august, av di Bir ikkje er den rette styresmakta i saker som gjeld førebygging av brann.

Må akseptera det

I saka etterlyste naboar ein leigeavtale, som HF har fått tilsendt. Leigeavtalen vart signert av Tjosås i januar 2020, og av leigetakaren i mai 2020. Avtalen gjeld frå juli 2019, og ut 2022. Det er presisert i avtalen at det må haldast orden, og at området ikkje må skjemmast av avfall og skrot. Det står også at heradet kan seia opp avtalen dersom ikkje leigetakaren oppfyller leigevilkåra.

— Kva er grunnen til at avtalen framleis står ved lag?

— Så lenge det ikkje er forureiningsfare eller til hinder for andre, vurderer me det slik at me og andre må akseptera det slik det er, seier Tjosås.

Området ved Båtavika er regulert til næring. Heidi E. Ørjansen, plan- og byggjesakssjef i Kvam herad, er ikkje med i prosessen der avtalar om kommunen sitt areal vert inngått, men hennar vurdering er at leigeavtalen er i tråd med reguleringsplanen. Vidare viser ho til at føresegnene opnar for lagerverksemd.

Dersom leigetakaren ikkje ryddar opp etter varselet om pålegg, kjem pålegg om opprydding. Om ingenting skjer, vert det snakk om tvangsmulkt. Vidare kan Bir be heradet om å rydda opp på leigetakar si rekning.