Brann i bil på Kvamskogen
Ein personbil tok fyr på Kvamskogen laurdag kveld.
Meldinga om hendinga kom klokka 18.52. Naudetatane, minus ambulansetenesta, rykte ut til Sporveishytten, der bilen vart parkert i ei busslomme etter at brannen oppstod.
Det var berre éin person i bilen, men han kom seg ut på eiga hand. Det vart ikkje meldt om personskadar eller fare for brannsmitte. Det kom mykje røyk frå dieselbilen. Trafikken stoppa i begge retningar, men vart etter kvart dirigert av brannmannskap.
Mannskap frå Kvam brann og redning sløkte brannen. Bilen vart heilt utbrend.
Sjåføren i bilen var Kasper Wilhelmsen Botnen frå Norheimsund. Han fortel til HF at det brått tok fyr i varmeanlegget i køyretøyet. Han svinga av vegen, gjekk ut or bilen og prøvde å sløkkja brannen med det han hadde for handa, nemleg snø. Det viste seg snøgt å vera heilt nyttelaust. Brannen stod raskt i full fyr.
Bilen var ikkje ny, men han var ny i hendene til kvemmingen. Botnen hadde nemleg nettopp henta køyretøyet og var på veg heim att med kjøpet, fortel han.
Innsatsleiar Svein Valland Laupsa i Kvam brann og redning opplyser at det er usikkert kva som gjorde at bilen tok fyr. Bilbergar vart tinga for å henta bilen, ifylgje politiet.
Politiet melde fyrst om at det var fleire personar i bilen som tok fyr, men det viste seg sidan å vera feil.
