Bøyer reddar liv

Det opplyser driftsplanleggjar Lars Torgilstveit i eit straumbrev til HF.

Bøyene kjem som regel frå forsikringsselskapet Tryg, som sidan 1952 har syrgt for 53.000 livbøyer ved sjø, vatn og elvar over heile Noreg. Sidan har bøyene bidrege til å redda over tusen personar frå å drukna, ifylgje tryg.no.

Fadderordning

Selskapet forvaltar ei fadderordning der private, lag, hamnevesen, friluftsråd eller kommunar kan ta initiativ til å setja opp og passa på livbøyer.

Kvam herad er positiv til dette, men driv ikkje aktiv oppfølging av fadrane, opplyser sjef for samfunn, næring og kultur i Kvam herad, Jon Nedkvitne.

Lokale lag og organisasjonar kan søkja om å få vera fadder for bøyer, også på kommunal grunn, i samråd med heradet og Bergen og Omland Friluftsråd (BOF).

Dei kommunale badeplassane vert i hovudsak forvalta av BOF. BOF har eit mål om å få sett ut livbøyer på alle desse plassane, fortel Nedkvitne. Kvam herad ynskjer eit tett samarbeid med BOF for å sjå om det er andre offentleg eigde område som bør få livbøyer.

Så mange er sette opp

Tryg opplyser at Kvam i alt har 146 livbøyer fordelte på 76 fadrar. Av desse er 8 «offentlege etatar» fadrar for 35 livbøyer. 16 foreiningar eller verksemder er fadrar for 51 livbøyer, og 52 privatpersonar er fadrar for 60 livbøyer.

Ullensvang har 180 livbøyer fordelte på 109 fadrar. Den siste livbøya her vart sett ut ved Ullensvang Hotel på Lofthus i mai.

Gjev når dei har

– Me gjev ut livbøyer så sant me har, og det plar me ha, seier kommunikasjonssjef i Tryg, Ole Irgens.

Selskapet er svært oppteke av at det skal vera livbøyer ved alle offentleg tilgjengelege badeplassar.

– Det er eit viktig tryggleikstiltak som me meiner burde vore påbode, skriv Irgens.

Livbøyene i Norheimsund sentrum og Øystese sentrum vert forvalta av Kvam herad. Kaien i sentrum av Norheimsund har tre livbøyer, medan badestranda med meieritomta manglar bøye. Båthamna i sentrum har heile fem livbøyer.

– Målet må vera at alle våre friluftsområde skal ha minst éi livbøye tilgjengeleg, så det må vera ei prioritert oppgåve fram mot neste badesesong, skriv Torgilstveit i BOF.

Manglar ikkje bøyer

Hamnesjef i Ullensvang kommune, Hjalmar Heimvik, seier det skal vera livbøyer i dei kommunale områda, og kommunen er fadder for dei. I område som tilhøyrer private eller lag, må desse vera fadrar sjølve.

Kommunen prøver å få opp bøyer etter kvart som ein får førespurnad om det. Heimvik kjenner ikkje til at det manglar bøyer i kommunale område.

Ferjekaien tilhøyrer Vestland fylkeskommune, så her har fylket sjølv ansvaret. Her er det sett opp livbøyer, ifylgje dagleg leiar ved Spar Jondal, Olav Eide.

Kommunen eig badestranda og ei flytebryggje i Jondal. Heimvik seier kommunen gjerne vil ha melding dersom livbøyer vert tekne ned eller manglar i offentlege område. Tryg leverer bøyene gratis, og det plar ikkje vera noko problem å få sett dei opp, seier han.