Botnagrend får ikkje gehør

Som HF har skrive før, endra Kvam herad kurs og tilrådde å nytta Botnagrend som adresse i namnesaka. Det opphavlege vedtaket var Botnen, men Roger Botnen fekk kommunalt gjennomslag med det nye framlegget i ein klage.

Like populært er ikkje namnet Botnagrend i Språkrådet, som framleis meiner Botnen er det beste alternativet. Rådet meiner at Botnagrend må vera eit konstruert namn som postverket har hosta opp.

– For postverket har det alltid vore nødvendig å finna fram til postadressenamn som ideelt sett er unike i heile landet. Dette gjer at dei i mange tilfelle har konstruert namn, namn som då ikkje har vore nytta i den lokale namnetradisjonen tidlegare, skriv Språkrådet i fråsegna og lista opp Lundegrend, Søreidgrend, Nordtveitgrend, Kvalvåggrenden som døme.

– I fleire tilfelle har bruken av dei konstruerte namneformene verka til at dei tilsvarande nedarva namna i større eller mindre grad har vorte fortrengde, skriv rådet.

Rådet minner om at ordet «grend» er lite i bruk i dag, i motsetnad til bygd. Dessutan påpeikar rådet at Botnagrend – altså ubunden form – ikkje harmonerer med avleiingsformene Botnadalen og Botnaelva, som har bunden form.

Kartverket er samd med Språkrådet og tilrår Kvam herad å velja namnet Botnen, av di det er mest i tråd med den «nedervde lokale uttalen». Den forklarande namnelekken «grend» – epeksegese, på fagspråk – førekjem også i ord som «Fyksegrenda», påpeikar Kartverket. Den siste lekken i «Opoelva» er eit anna døme.

– Det er situasjonsbunden bruk i spesielle samanhengar der ein treng å klargjera effektivt kva slags stad det er snakk om, og ikkje å rekna som genuine namneformer i seg sjølv. I offentleg namngjeving bør ein halda seg til dei tradisjonelle namneformene og så langt råd er unngå namneformer som kan medverka til å endra den lokale namnebruken, skriv Kartverket.

I den siste høyringa tok både Soldal og Porsmyr grendeutval og Svanhild Aksnes Botnen til orde for å nytta adressenamnet Botnen.

Om Kvam herad er villig til å endra kursen igjen, er førebels ukjent.