Marcus Vikør Bjørke (t.v.) og Sigurd Vangdal (t.h.) ventar på å verta berga av jentene i gruppa.

Born trenar på viktige oppgåver

Sidan i fjor haust har ei gruppe born og unge samlast for å øva på kart og kompass og livredning. Førre veke stod mellom anna kameratredning på planen.

Mari Ulvund
Journalist
Publisert Sist oppdatert

– Eg er ganske sikker på at me får prøva ein del som mange andre ikkje får, seier Sigurd Vangdal.

Han er ein av dei 32 aktive medlemane i Barnas Røde Kors (Bark) i Øystese og Norheimsund. Vangdal har vore med sidan starten i fjor haust.

Sjå video av kameratredninga her:

Livredning og leiteaksjon

Førre veke var han i Hardangerbadet saman med seks jamaldringar. To kanoar var grundig reingjorde og plasserte i hovudbassenget då ungdomane øvde på kva dei må gjera dersom ein kano kvelvar.

Dei sju sjuandeklassingane som var til stades, bytte på å vera dei som fall uti vatnet, og dei som måtte berga venene sine. Gjengen synte at han meistra oppgåvene dei fekk.

Hanne Berge (t.v.) og Betlehem Hailet Tesfamariam reddar Kristi Lid Mæland.

Også Hanne Berge og Marcus Vikør Bjørke har vore med i Bark i om lag eitt år. Båe fortel at dei vart med fordi dei tykte det såg moro ut å vera med i Røde Kors. Ifylgje Bjørke har ungdomane lært ein del om bruken av kart og kompass. Dei har også trena på livredning, og leita etter ei øvingsdokke i Laupsadalen i mørkeret.

Fleire av ungdomane gler seg til snøen kjem. Vangdal tykkjer det er ekstra stas å få vera med på snøskuterturar og aktivitetar med ski på beina. Dessutan gler han seg til å øva på skredsøk, fortel sjuandeklassingen.

Åshild og Bjarte Helland rettleia dei eldste Bark-medlemane då dei hadde samling i Hardangerbadet førre veke.

Von om rekruttering

Veltetreninga i bassenget er ei av mange øvingar ungdomane har hatt med kano. Dei har også øvt seg i kano når dei har padla i Hardangerfjorden og i Fitjadalen, fortel Åshild Helland. Ho har ansvaret for gruppa med dei eldste Bark-medlemane saman med ektemann Bjarte Helland.

Åshild er imponert over innsatsen. Både ho og Bjarte vonar at aktivitetane vil vekkja interessa for Røde Kors og arbeidet organisasjonen gjer.

– Og så har me ei von om at dei vil verta ein del av hjelpekorpset når dei vert eldre, seier Åshild.

Magne Helland (t.v.) og Eirik Øvsthus Kolltveit er to av dei eldste medlemane i Bark-gruppa.

Varierte oppgåver

Medan dei eldste øvde i det våte elementet, heldt to grupper seg på land. Ved lagshuset i Øystese var fleire grupper i gang med ulike oppgåver. Dei sorterte flasker og boksar, teikna og repeterte hjarte-lunge-redning.

Ronja Flotve tykte det var kjekt å ta seg av all panten frå innsamlingsboksane til Øystese Røde Kors.

I gruppa med dei yngste medlemane er mellom andre Ronja Flotve. Andreklassingen fortalde ivrig om alt ho har gjort sidan ho byrja i Bark i fjor. Ho har mellom anna lært at det er viktig å hjelpa andre.

– Me kan sjå etter om folk er sjuke eller skadde. Og så kan me trøysta dei som er lei seg, seier Flotve.

Gruppa med dei yngste medlemane gjorde klar posar med flasker og boksar som skulle pantast. Her ryddar borna saman med Solveig K. Botnen (t.v.) og Heidi Flotve, som er ein av dei faste, frivillige medhjelparane i gruppa.

Borna samla panteflasker i posar i høgt tempo. Aktivitetsansvarleg Solveig K. Botnen og frivillig medhjelpar Heidi Flotve såg til at alt gjekk fint føre seg.

– Treng fleire armar

Det fyrste året med Bark tykkjer Botnen har gått fint. Ho har ansvaret for Bark Øystese. Ifylgje henne har det vore mykje å setja seg inn i.

Gurine Vangdal (t.v.) ventar på påfyll av boksar og flasker.

Sjølv om dei aktivitetsansvarlege er kursa gjennom Raudekrossen, er det mykje dei lyt finna ut av på eiga hand. Det er ikkje noka oppskrift på korleis samlingane skal gjennomførast, og mykje tid gått med til planlegging, forklarar Botnen.

– Ein del born og unge i dag er rastlause, så det er viktig å passa på at me har aktivitetar som dei kan bryna seg på, seier ho.

Mellom slaga med livredningstrening og sortering av flasker hadde Ronja Flotve (t.v.) og Hennie Klyve Torpe ei roleg stund med teikning.

I tillegg til dei aktive medlemane i Bark-gruppa, står 15 born på ventelista. Ifylgje Botnen er klubben avhengig av fleire frivillige som kan vera aktivitetsansvarlege dersom han skal kunna ta inn fleire.

– Me har ein aktiv og fin kjerne, og mange stiller opp og deler på arbeidet. Men me treng fleire armar, seier ho.

Erlend Flotve øver på fyrstehjelp saman med borna i Bark-gruppa.

– Skal vera kjekt

Ifylgje Botnen er Bark eit lågterskeltilbod. Det er gratis og tilpassa behova til borna. Ynsket er mellom anna å bidra til fysisk aktivitet og leggja til rette for meistringsopplevingar. Både frivillig arbeid, øving i fyrstehjelp og sosiale aktivitetar fyller samlingane.

– Det er viktig med samhald. Det skal vera kjekt å vera med i Raudekrossen, understrekar Botnen.

Bark er eit tilbod for born i alderen 6 til 13 år. Sjølv om tilbodet er eit samarbeid mellom laga i Øystese og Norheimsund, er dei fleste borna frå Øystese. På grunn av manglande kapasitet har det ikkje vorte teke inn nye medlemar i år, forklarar Botnen. Dimed er dei yngste i gruppa andreklassingar.

Frå venstre: Thea Soldal, Olivia Gjerde, Oda Øvsthus Kolltveit, Hanna Haugsland Ur og Sofie Vikør Bjørke sat og teikna då HF var innom. Dei fortalde at dei har det veldig moro saman på samlingane.

I laget i Øystese er det mange som bidreg. Dei aktivitetsansvarlege for dei ulike gruppene – Botnen, Helland og Hilde Laupsa – planlegg ofte samlingane saman. Dei får god hjelp frivillige i laget. Ifylgje Botnen er 8–12 frivillige med på kvar samling.

frivillighet øystese nyhende røde kors fritid
Laga med Labrador CMS