Born hjelpte born i Jondal

Rannveig Hammer er kontaktlærar for 1. klasse på skulen. Ho fortel at skulen i fleire tiår har gjennomført sin eigen vesle innsamlingsaksjon. Aksjonen vert kalla «Born hjelper born». Målet er at dei yngste elevane på skulen skal gjera noko for å hjelpa born som har det vanskeleg.

I år samla skulen inn pengar på to måtar 8. november. For det første sprang elevane på kunstgrasbanen ved skulen. Elevane frå 1. og 2. klasse sprang på langs av banen, medan elevane frå 3. og 4. klasse sprang rundt banen. Elevane hadde skaffa seg sponsorar som betalte for innsatsen.

– Dei ivrigaste av dei eldste sprang 20 rundar, medan dei ivrigaste av dei yngste sprang att og fram 25 gonger, fortel Hammer.

For det andre inviterte skulen til kafé med sal av kaffi, saft og kaker. Maten var laga av foreldre.

Hammer fortel at tidlegare var marknadsdag med sal av produkt og lodd det vanlege. Dette endra seg med koronapandemien.

– I samband med pandemien byrja me med fysisk aktivitet ute. Inntektene har faktisk auka etter at me begynte med springing og sponsing, seier ho.

«Born hjelper born» vert gjennomført fordi skulen ønskjer å læra elevane at det hjelper å hjelpa.

– Me vil syna elevane våre at litt innsats kan gjera at andre får det betre. Elevane tykkjer dette er veldig kjekt, seier Hammer.