Ferjer stort sett i drift igjen

Etter at Boreal fekk eit mellombels seglingsløyve frå Sjøfartsdirektoratet seint onsdag kveld, var ferjene stort sette i drift igjen torsdag.

Ferjestansen kom etter at Sjøfartsdirektoratet onsdag trekte tilbake tryggingsstyringssertifikatet til reiarlaget. Konsekvensen var at alle fartøya til reiarlaget måtte leggjast til kai, og tusenvis av passasjerar vart ramma.

Tre statsrådar var i møte med direktoratet onsdag kveld for å finne ei løysing på ferjestansen, som ramma store delar av kysten.

Det mellombelse driftsløyvet kom etter at Boreal hadde lagt fram ein plan med tiltak dei skal setje i verk for å få orden på tryggingsbrota.

Ifølgje VG kom Sjøfartsdirektoratets reaksjon onsdag mellom anna av minst fem alvorlege hendingar med ferjene til reiarlaget. Det er snakk om fleire tilfelle av kollisjonar med ferjekaiar, ferjebruer og andre fartøy som involverte ferjene Husøy, Herøysund og Alsten.

Boreal kan heller ikkje dokumentere at pålegg frå Sjøfartsdirektoratet for fartøya Haarek, Tomma og Helgeland vart avviksbehandla.

– I desse tilfella ser vi i ettertid at vi har vi hatt meir fokus på å utbetre skadar enn å få dei rapporterte. Der har vi svikta, seier konsernleiar Kjetil Førsvoll i Boreal Noreg.

Torsdag morgon starta dei fleste avgangane til Boreals ferjer og hurtigbåtar som normalt, men med nokre forseinkingar på dei første avgangane i nord.

På Sunnmøre kom òg hurtigbåtane i gang igjen torsdag morgon, og ferjesambandet til selskapet gjekk som normalt òg i Vestland.

(©NPK)