Boreal droppa risikovurdering etter fleire hendingar, ifølgje Sjøfartsdirektoratet

I Hordaland er sambanda Kvanndal–Utne, Kinsarvik–Utne og Skånevik–Matre–Utåker stengde etter at Boreal fekk tryggleiksgodkjenninga inndregen av Sjøfartsdirektoratet i dag. Skyss har sett beredskapsstab.

– Skyss ser alvorleg på situasjonen, som råkar mange reisande, seier direktør i Skyss, Målfrid Vik Sønstabø, i ei pressemelding.

Skyss jobbar i kveld med å sjå på om det er mogleg å leiga inn passasjerbåt på samband der dette kan vera aktuelt, og med å undersøkja om andre reiarlag kan setje inn erstatningsferjer på sambanda som no er stengde.

– Dette er krevjande å få til på kort varsel, og me vil ikkje klara å få alternativ på plass i kveld, seier Sønstabø.

Kravde ikkje tilsyn

Ved fleire hendingar lét selskapet vere å krevje skade- eller havaritilsyn slik at direktoratet kunne vurdere om det var sikkert å segle, skriv direktoratet i ei pressemelding.

– Reiarlaget har ikkje internt følgt opp og risikovurdert teknisk svikt i utstyr som leidde til hendinga, heiter det i meldinga.

Dei skriv òg at reiarlaget ikkje har følgt opp pålegg og førespurnader frå Sjøfartsdirektoratet. Ei rekkje hendingar vart ikkje rapporterte inn, noko som er påkravd av tryggingsomsyn.

Fakta om Sjøfartsdirektoratets revisjon av reiarlaget Boreal

Sjøfartsdirektoratets oppsummering av revisjonsfunn ved minst fem alvorlege hendingar i reiarlaget Boreal:

* at dei ved fleire hendingar ikkje har kravd skade/havaritilsyn slik at Sjøfartsdirektoratet kan vurdere om det er sikkert å segle. Dei har med det operert fartøya utan gyldig sertifikat.

* at dei ikkje har utført risikovurdering etter at skaden/hendingane hadde skjedd.

* at reiarlaget ikkje internt har følgt opp og risikovurdert teknisk svikt i utstyr som leidde til hending.

* reiarlaget har ikkje følgt opp pålegg og førespurnader frå Sjøfartsdirektoratet.

* ikkje har rapportert fleire hendingar til Sjøfartsdirektoratet som er påkravd av tryggingsomsyn.