— Bør ta lokale grep
Terje Kollbotn (R) vil nytta konsesjonskraft til å sikra innbyggjarane låge kraftprisar.
Det er i ein interpellasjon til kommunestyremøtet tysdag at Kollbotn lanserer framlegget.
Kvam heradsstyre vedtok 9. desember å setja rådmannen i sving med å greia ut ei liknande løysing. Også Kollbotn føreslår i fyrste omgang å tinga ei sak om å forvalta konsesjonskrafta slik at ullensvangarane får ein «rimeleg kraftpris».
I same slengen meiner Kollbotn at dei folkevalde bør protestera mot krafteksport når det er lite vatn i magasina og mot medlemskap i energiunionen Acer, og å gå inn for å sikra langsiktige, rimelege kraftprisar i industrien i landbruket, pluss eit toprissystem for hushaldningane.
Kollbotn viser i argumentasjonen til at Ullensvang er mellom dei største kraft- og industrikommunane. Han meiner tiltaka som regjeringa har lansert for å sikra lågare prisar, ikkje er tilstrekkelege.
Ifylgje Kollbotn har kommunen tilgjengeleg like mykje konsesjonskraft som hushaldningane, næringslivet, minus storindustrien, og offentlege eigedomar til saman nyttar. Krafta vert i dag seld i kraftmarknaden og tilfører kommunen store inntekter.
