– Bør sikrast ventekai
Kurt Sollesnes i Hardanger Fjordcruise har kome med fleire innspel til Ullensvang kommune om den strategiske hamneplanen.
Sollesnes, som har drive med turistbåtar sidan 2010, peikar på utfordringar knytte til fleire av hamnene i kommunen. I målet i planen står det at ein skal leggja til rette for offentleg transport og vareta behovet til sjøfarten. Mange kaiar er bygde ned, slik at dei ikkje lenger kan brukast til større fraktefartøy, skriv Sollesnes. Til dømes vert det føreslege å sikra ein ventekai i jondalsområdet til ferje nummer to. Dette er i dag ei utfordring for Fjord1, hevdar han.
I Jondal må også eit skilt på plass att ved den kommunale flytebryggja, skriv Sollesnes. Skiltet, som viser at det berre er tillate med av- og påstiging, vart teke vekk ved kongebesøket i 2019, og har ikkje kome på plass sidan. Til tider ligg det båtar fortøydd der, skriv Sollesnes.
Elles nemner han at Odda hamn har utfordringar med vind og manglar straumsøyle. Tyssedal har ein for høg kai for mindre fartøy, medan den nye småbåthamna på Nå er eit positivt tilskot slik Sollesnes ser det. På Utne trengst avklaring av eigarforholdet til kaien, noko som påverkar tilgangen for turistbåtar og hotellgjester, påpeikar han.
Høyringsfristen gjekk ut 15. september.
