– Bør bruka det eigentlege namnet
Kallenamnet «Negerlandsbyen» har dukka opp på eit skilt i Mødal på Kvamskogen.
Foto av skiltet har òg dukka opp i sosiale medium. Hanne Henningsen og Elin Hoffmann Dahl seier til Bergens Tidende at dei reagerer på skiltet. Dei var på skitur mot Såta laurdag då dei såg to skilt på eit tre. På det eine stod det Mødal, på det andre Negerlandsbyen.
Kvamskogen er ein populær stad å reisa for mange skular som har skidag. Henningsen trur ikkje det er kjekt for born med ein annan hudfarge å lesa eit slikt skilt, seier ho til regionavisa.
Sjølv om nokre seier dei ikkje har ein rasistisk tanke bak bruken, bør ein ta omsyn til dei som kan verta råka, seier Henningsen.
– Dette er ikkje ord eller namn me brukar i 2023. Me lever i ei global verd, og språket har betyding, seier ho til BT.
Torkjell Kjosås, lokal kjentmann på Kvamskogen, seier kallenamnet fyrst og fremst var nytta av bergensarar fordi ein sat i sola og fekk farge.
– Det heiter Mødal, og det er namnet som bør brukast, seier han til BT.
Grunnen er ikkje minst tryggleiken. Det er ikkje sikkert at hjelpa kjem raskt fram om ein brukar eit kallenamn i staden for namnet som står på kartet, seier Kjosås.
Gunnar Andreas Sandvik skriv elles til HF at han oppdaga at appen Skisporet også hadde med det unemnelege kallenamnet sundag morgon, før han las om skiltet i BT. Han gjorde kreftene bak appen merksam på dette.
– Seinare same dag hadde dei endra teksten, opplyser Sandvik til HF.
