BKK gir pengar til solcellepanel på dagsturhytter
Kraftselskapet BKK gir tre millionar kroner i gåve til dagsturhytteprosjektet, noko som skal sikre solcellepanel til alle hyttene.
– Dagsturhyttene er i tillegg til nynorsk den felles identitetsmarkøren som det nye fylket kan samle seg rundt når det no vert etablert dagsturhytter i alle kommunane i Vestland. Det nynorske turbiblioteket i hyttene stimulerer til både leseglede og turglede. Tusen takk til BKK, som støttar denne flotte suksessen, som er med på å styrke lokalsamfunna, seier fylkesordførar Jon Askeland i ei pressemelding frå Vestland fylkeskommune.
Dagsturhyttene skal vere eit lågterskeltilbod for turgåarar. Der kan dei ta pause på turen, søkje ly og ete matpakka si. Dei 26 dagsturhyttene i tidlegare Sogn og Fjordane har såkalla nynorske turbibliotek med bøker til bruk på hyttene.
Artikkelen held fram under annonsen.
19 av dei 26 hyttene i tidlegare Sogn og Fjordane har allereie installert solcellepanel. Pengane frå BKK vil der gå til andre tiltak ved og på vegane til hyttene.
Dei tre første dagsturhyttene i tidlegare Hordaland kjem i Alver kommune og vert monterte i september i år. Planen er å få på plass til saman 13 hytter før nyttår, melder fylkeskommunen.
