Billeg kraft, men mjølka som normalt

– Året har vore prega av korona og kraftprisane. Det har vore ei utfordring for likviditeten i selskapet med vesentleg dårlegare inntekter frå kraftsal, men me har ridd stormen av til no.

Det sa styreleiar Gunnar Skeie då generalforsamlinga i den kommunalt åtte mjølkekua vart avvikla 15. juni. Selskapet hadde eit uhyre lågt overskot på sjølve kraftsalet.

– Eg er glad for å leggja 2020 bak meg. Det har vore eit krevjande år. Resultatet for kraftproduksjonen var begredeleg, sa administrerande direktør Arne Tillung.

Rikeleg å gjera

Gjennomgangen til dei to frontfigurane illustrerte at medan kraftprisane har vore låge, har aktiviteten vore høg.

Den nye konsernstrukturen, som kjem av kravet om såkalla selskapsmessig og funksjonelt skilje, galdt i praksis frå 1. april, og systema måtte tilpassast til omlegginga. Tidlegare Kvam Kraftverk AS er no eitt av to dotterselskap under Kvam Energi. Det andre heiter Kvam Energi Nett AS. I samband med splittinga måtte også kundedatabasane splittast.

I tillegg kom altså koronatiltaka og dei økonomiske utfordringane, attåt årlege prosjekt som ikkje kan stoppast. På toppen av det heile kom fullføringa av nye Skulafossen kraftstasjon.

– Mange ekstraordinære saker og situasjonar har prega kvardagen, sa Tillung.

Dei viktigaste koronatiltaka var to frammøtestader, ein i Øystese og ein i Norheimsund, og omfattande bruk av heimekontor for alle som ikkje måtte ut i felten. Selskapet hadde ved årsskiftet 29 tilsette i 29 årsverk, med eit samla sjukefråvær på 2,03 prosent i fjor.

– Dei tilsette har verkeleg stått på. Me har hatt tilnærma normal drift og ikkje smitte, berre nokre i ventekarantene. Forsyningstryggleiken har ikkje vore svekt, sa Tillung.

Han sa at det er utfordrande å sikra eit godt arbeidsmiljø når alle sit spreidde, men at dei tilsette har prøvd å halda kontakt på telefon og gjennom Teams.

Fekk krisehjelp

Driftsinntektene gjekk ned frå 146 millionar kroner i 2019 til 102 millionar i fjor, i hovudsak som fylgje av dei nemnde, stusslege kraftprisane. Snittet var på 9,7 øre, mot 38,7 øre året før. I periodar har sjølve krafta i praksis vore gratis for kundane.

Gode tal innan både kraftomsetning og nett, pluss låge renter, pynta brura litt. Fibernettet gjekk med eit lite underskot også i år, trass ein inntektsauke på 0,8 millionar kroner.

Årsresultatet i konsernet vart til sist vel ti millionar, som var betre enn prognosane då det såg som verst ut tidleg på hausten.

– Me er rimeleg nøgde med det ut frå kraftprisane, sa Tillung.

Selskapet nyttar Danske Bank, som i fjor gav «krisehjelp»i form av auka kreditt for å gjera låntakaren i stand til å oppfylla dei økonomiske forpliktingane. Truleg vil ikkje selskapet vera i stand til å innfri alt, så ein del vil verta konvert til lån, ifylgje Skeie. Med gode overskot dei neste åra kan gjelda reduserast.

– Det er det me planlegg for, sa han.

Generalforsamlinga, som er Kvam heradsstyre, vedtok, i tråd med rådet frå styret, å ta ut 7,7 millionar kroner i utbyte.

Ny stasjon i drift

Arbeidet med Skulafossen kraftstasjon vart fullført i fjor, og han vart sett i prøvedrift i desember. Ifylgje Tillung fungerer han veldig godt og har ein heilt normal produksjon. Anlegget erstattar ein stasjon med maskiner frå 1950. Desse leverte sin siste kilowattime 14. juni. Inntektstapet som fylgje av driftsstansen var ikkje stort.

Kostnaden er på om lag femti millionar kronar, tilsvarande 1,87 øre per produsert kilowattime.

– Svært billeg, sa styreleiar Skeie.

– Eit svært godt kraftprosjekt. Eg meiner me utnyttar vatnet på best mogeleg måte, sa Tillung.

Den gamle røyrgata i dagen er fjerna og ei ny lagd i fjellet. Tilsyn frå styresmaktene har medført berre vellæte, og entreprenør GBS Entreprenør AS har gjort ein god jobb for å få eit miljømessig godt resultat, skrytta Tillung. Etter «revegeteringa» skal det knapt finnast spor etter byggjeaktiviteten, forsikra han.

Han understreka at dei tilsette no har mykje betre og sikrare tilkome til vassvegen enn tidlegare, noko som er viktig med tanke på helse, miljø og tryggleik.

– Eg vil gje honnør til tilsette, dagleg leiar og styret for godt utført arbeid med prosjektet, sa varaordførar Frode Nygård (Frp).

Uttak styrer utbygging

Direktøren sa at energiselskapet reknar med at straumforbruket vil auka. Difor er det viktig at føretaket har kunnskap tidleg til å ta hand om eventuelle forsterkingar i nettet som vert naudsynte.

– Det tek tid å utvikla nettprosjekt. Eg trur me kjem til å få ein del investeringar dei neste åra, sa han.

Han påpeika at det såkalla effektuttaket – det maksimale straumforbruket i eit kort tidsrom – kan få meir å seia. Nettet må dimensjonerast etter dette. Uttaket er høgast om morgonen og ettermiddagen på kvardagane. Helst burde det vore jamt mellom heile døgeret, ifylgje Tillung.

Held fram som før

Generalforsamlinga valde på nytt dei lemene i styret som stod på val i år: fast lem Merete Salvesen Wallevik og varalem Hans Gravdal. Skeie held fram som leiar, saman med dei nemnde, Anne Marie Øvrevik, Vidar Riber og tilsettrepresentant Gunnar Mundheim. Styret får den same godtgjersla for arbeidet som dei siste åra, i fjor totalt 412.000 kroner.

Styret har evaluert eige arbeid gjennom anonyme spørjeskjema. Konklusjonen er at styret gjennomgåande er nøgd med eige arbeid, men styret vil arbeida vidare med enkelte tilbakemeldingar.

Ottar Randa (H) sa at han har inntrykk av at styret har lyfta seg litt dei siste åra.

– Same kva ein driv med, prøver ein å bli betre. Eg håpar at me er i ein prosess der styrearbeidet får høgare kvalitet og styret vert meir eigna til å styra bedrifta, sa Skeie.

Kraftselskapet har om lag 7.500 nettkundar. Av desse er 2.500 fritidsbustader.