Bilfest starta i Kvam
Truleg er det lenge sidan sist det var samla så mange hestekrefter i Øystese.
Årsaka er at arrangementet Motorfest 2023 starta i bygda. Bak Motorfest 2023 står Motorfest AS.
– Me tek mål av oss å arrangera Noregs råaste «road trip», fortel dagleg leiar Dag Gjertsen.
I alt var 60 sportsbilar og 115 personar påmelde. Gjertsen fortel at arrangementet går frå torsdag til sundag. I år hadde arrangøren valt å lata turen gå frå Øystese til Sogndal. Frå torsdag til fredag overnatta deltakarane på Hardangerfjord Hotel AS.
Før kortesjen sette kursen nordover, rulla den gjennom Norheimsund og Tørvikbygd på veg til Odda, der lunsj stod på programmet.
Gjertsen har arrangert Motorfest sidan 2021. Kvar gong følgjer turen ei ny rute. Sjølv om turen har vore innom Kvam før, er dette første gong den startar i heradet.
– Når me valde å leggja starten til Øystese, er det fleire grunnar til det. For det første er staden bra plassert i forhold til ruta. For det andre treng me eit hotell som er stort nok og har nok parkeringsplassar, seier han.
Deltakarane kjem frå heile landet. Ingen av deltakarane er frå Kvam, men Gjertsen fortel at det er ein heil delegasjon frå Kvinnherad.
Deltakarane er i alle aldrar. I alle aldrar er også doningane.
– Her er det alt frå klassiske bilar til heilt nye bilar. Felles for alle er at dei er sportsbilar, fortel Gjertsen.
Sjå video av kortesjen her:
