— Bilar vekte hotellgjester
Biltrafikk ved hotellet i Øystese var til bry for gjestene tidleg i mai.
Det fortel hotelldirektør Tanja Borge. Ho har teke saka opp i både brev til og møte med ordførar Torgeir Næss (Ap).
I brevet 3. mai skriv ho at gjestene ikkje fekk sova helga før. Årsaka var ungdomar som «burna» og bråka på parkeringsplassen ved hotellet. Ho kontakta politiet, men saka vart ikkje prioritert.
HF snakka med Borge onsdag. Ho opplyser at det ikkje har kome klagar etter den fyrste helga etter at hotellet opna att, og vonar at det vil halda fram slik.
Borge er sjølv bilinteressert og har såleis forståing for den ungdomelege billeiken, men ho vonar det er mogeleg å finna alternativ som kan gje dei utløp for lystene.
— Me har vel alle vore kalv. Eg har veldig lyst til at ungdomane skal få seg ein stad, men me har ikkje plass til slikt her. Det er jo eit stort og kjekt bilmiljø i Kvam, seier ho.
Ordføraren har meldt tilbake til Borge at bråket er ei politisak, men at han vil ta henne opp i neste politiråd, der politiet og heradet møtest.
Borge gler seg elles over å få høve til å skjenkja til midnatt og utan matservering attåt igjen. Ho seier talet på førespurnader auka kraftig då meldinga om tiltaksletta kom frå regjeringa førre veke, mellom anna frå storfamiliar som har vore hindra i å samlast.
— Me kjenner at det går rett veg no, seier direktøren.
