Bil hamna mellom store skred – bustad er evakuert

Ifylgje Vest politidistrikt vart ein bil altså ståande fast mellom to skred, men personen i bilen kom seg i tryggleik. Det er ikkje meldt om andre personar i det råka området.

Ifylgje Bergensavisen, som siterer operasjonsleiaren i Vest politidistrikt, hjelpte ein entreprenør personen i den innesperra bilen med å evakuera og koma seg på arbeid. Føraren måtte stogga då det kom eit skred framom bilen. Så gjekk det eit nytt bak vedkomande.

Ifylgje politistasjonssjef Terje Sperrevik har bebuarar i eit bustadhus i området evakuert seg sjølve. Ein stein skal ha treft husveggen deira på Floten. Kvam herad har hjelpt til med innkvartering av dei som er evakuerte, fortel ordførar Torgeir Næss (Ap).

Ordføraren opplyser at ei praktisk utfordring som må løysast, er den interkommunale legevakta på Voss om natta. Også lokalsjukehuset til kvemmingane ligg på Voss, men til alt hell er vegen til Bergen open, påpeikar han.

Stengd til tysdag

Vegtrafikksentralen vest melde klokka 10.27 at vegen vert stengd minst til klokka 15 tysdag. Då vil geologar vurdera området igjen.

Kommunegeolog Tore Dolvik i Kvam herad fekk tilfeldigvis høve til å vera med i helikopteret og studera området. Han seier vegvesenet må vurdera situasjonen, men ottast at vegen kan verta stengd ei tid. Vegvesenet har no to geologar på plass i området, fortel han litt etter klokka 11 tysdag.

Dolvik seier mildvêret og nedbøren kan ha vore den utløysande årsaka, men trur med tanke på omfanget at losneområdet må ha vore ustabilt frå før. Dolvik trur det kan liggja 400–500 meter over fjorden.

Stor stein

Ifylgje trafikkoperatør Ken Ove Holm ved sentralen har mellom anna ein stein på om lag fem meter falle ned på vegen. Ein geolog vart rekvirert for å vurdera området frå helikopter.

Holm reknar uansett med ei litt langvarig vegstenging, ettersom dimensjonen på steinen tilseier at han truleg må piggast eller sprengjast.

I tillegg til store steinar er det kome mindre stein-, jord- og lausmassar ned i vegen, fortel Holm. Han opplyser at skreda gjekk litt nedom bomstasjonen ved Kjepso, i retning mot Kvanndal, ikkje langt frå grensa til Voss.

– Tenkte me hadde flaks

Vest Trafikksikring har dirigert trafikk i samband med vegarbeidet mellom Ålvik og Kjepso sidan september. Fleire av dei tilsette, mellom dei Kåre Lie, pendlar frå Granvin. Lie seier til HF at han er klar over at reisevegen er skredutsett, men at han ikkje kan tenkja på det. I dag tidleg kom han og kollega Steffen Slettemark til Kjepso ei stund før skreda gjekk.

– Me snakka vel litt om at me hadde flaks, seier Lie.

– Me veit jo at heile vegen er farleg, men ein kan ikkje sitja og tenkja på at det kan koma ras, seier Slettemark.

Dei to reknar med å måtta køyra via Trengereid og E16 for å koma seg heim etter arbeid i dag. Korleis arbeidsdagen vert, var i føremiddag litt uklart.

Øyvind Flatabø, som bur nokre få hundre meter frå skredstaden, seier til HF at han ikkje høyrde lyd frå skreda i dag tidleg, men at han registrerte at det dukka opp utsendingar frå naudetatane på ein plass rett nedom huset hans.

Entreprenøren var på veg til staden då meldinga om stengd veg fyrst kom frå Vegtrafikksentralen vest klokka 07.25. Også naudetatane rykte ut til staden.