Bikka 100 dagar butikk

Butikksjef Bergljot Eiken Berg seier at ingen dagar er like. Å driva butikk i distrikta er alt anna enn føreseieleg.

– Nokre dagar er det mange kundar, andre dagar få, seier Berg.

Om sommaren er ei god blanding av turistar og lokale kundar innom. Og varmen merka butikksjefen godt. Salet av is har vore bra så langt i sommar.

– Det er populært med ismaskina vår, seier ho.

Berg meiner det er viktig for folket i bygda å ha ein stad å møtast. Det har butikken fått til.

– Det er mange som set seg ned for å prata, anten ute eller inne, seier ho.

Nyleg feira butikken at han har vore open i 100 dagar. Skal ein tru sjefen, er det ikkje nokon ny butikkdød i sikte i bygda.

– Me håpar det går bra, seier ho.

For henne er det viktig å driva ein butikk som kan tilby dei varene kundane ynskjer. Om det er ting som manglar og som kundane etterlyser, strekkjer ho seg for å skaffa produkta. Dette er unikt for dei små butikkane i lokalsamfunna. Men éin plass går grensa.

– Eg kan ikkje ta inn tjue ulike krydder, seier ho og ler.