– Bevar bassenget i Ålvik!
Ålvik Idrettslag og foreldrearbeidsutvalet ved Ålvik skule uttrykkjer sterk motstand mot forslaget om å stengja bassenget i Ålvik.
Rådmannen har føreslege å stengja bassenget for å spara 250.000 kroner årleg i tilskot til drifta. Idrettslaget og foreldrearbeidsutvalet (FAU) meiner at det er ein liten sum å spara i forhold til kor mange som vert råka av kuttet. Det skriv idrettslaget og FAU i eit sams skriv til Kvam heradsstyre.
Bassenget, som i dag vert drive på dugnad av idrettslaget, foreldre og skuletilsette, er eit sentralt fritidstilbod for bygda. På kveldstid organiserer og tilbyr idrettslaget kveldsbading i ulike grupper for alle aldrar. Dette er hyppig nytta, og eit viktig tilbod for alle som bur i Ålvik, skriv FAU og idrettslaget.
Dei meiner at bassenget fremjar symjeferdigheiter, tryggleik i vatn og fysisk aktivitet, og er eit sosialt møtepunkt. Stenging vil føra til at elevar må transporterast til Øystese for symjeundervisning, noko som reduserer undervisingstida og gjev auka transportkostnader. Ålvik Idrettslag oppmodar heradet om dialog for å finna alternative innsparingar.
Formannskapet drøftar budsjettet 27. november.
