Best i Vest

Gruppa har delteke i eit læringsnettverk for «Leve hele livet — pasientsikkerhet og kvalitetsforbetring». Nettverket har vore i regi av Utviklingssenter for sykehjem og hjemmetjenester i Vestland.

Prosjektet starta i september 2020 og vart avslutta 11. mai. Fleire kommunar i Vestland har delteke.

Gruppa frå Kvam har hatt fokus på aktivitet og fellesskap ved Mikkjelsflaten. Utfordringa deira var at det var for få tilbod til aktivitetar. Ein av hypotesane dei bruka var «Det fins mykje me ikkje veit at bebuarane vil vera med på».

— Me har blant anna spurt kvar og ein som bur her kva dei likar og kva dei vil finna på. Og der har me teke feil, fortel Ingunn Kråkevik.

Kråkevik er gruppeleiar på Mikkjelsflaten. I undersøkinga fann dei ut at brukarane ynskte både å fiska, dansa og eta god mat. Andre forslag var vedkløyving, båtturar, sykling og basar.

— Det er lett å tenkja at dei er litt eldre og keisame, men dei vil jo leva dei òg, seier Kråkevik.

Som avslutning leverte alle inn ein plakat som seier noko om prosessen og vegen vidare. Gruppa frå Kvam herad vann prisen for beste prosjekt, og fredag feira tilsette og bebuarar prisen med grilling, kake, brus og alkoholfri øl i bakhagen.

— At me vann er veldig kjekt og motiverande med tanke på å fortsetja utviklingsarbeidet. Dette viser at me har gjort noko som er bra og har tenkt riktig, seier Eldfrid Romsås Oma.

Elevane frå Vg1 Helse og oppvekst (sjå hovudsak) er ein del av dette prosjektet.