Bergensfirma skal heva båt
No har heradet avgjort kven som får oppdraget med å heva MS «Rover», som sokk ved kaien i Norheimsund 17. januar.
Det kjem fram i eit brev til tilbydarane sendt 28. august.
Båten sokk ved kai på Tolo i Norheimsund i januar, og der ligg han enno. I august vart båteigaren – Nordlys - Kystforening – varsla om at heradet vil fjerna båten og krevja utgiftene dekte i ettertid, i tråd med eit vedtak frå så langt tilbake som februar.
Tre leverandørar vart vurderte til å heva og levera den tidlegare kvalfangaren til destruksjon på Hanøytangen. Valen Marina, Hauge Transport og Handel AS og IMC Diving AS leverte tilbod. Sistnemnde har fått oppdraget.
Båten skal hevast og fjernast måndag 16. september, opplyser Malin Namdal, branninspektør og sakshandsamar i Kvam brann og redning.
Prisen er ikkje kjend enno. I tevlinga talde pris 50 prosent, løysing 20 prosent og miljø 30 prosent. IMC Diving hadde lågast pris, ei god løysing og ein god plan for å vareta miljøet, skriv rådmannen i tildelingsbrevet.
