Bergen med inngripande tiltak etter smitterekord

Det siste døgnet er det registrert 103 nye smittetilfelle i Bergen. No innfører dei svært inngripande tiltak.

Bergen stengjer alle treningssenter, og serveringsstader må stengje klokka 22, opplyste byrådsleiar Roger Valhammer (Ap) på ein pressekonferanse fredag.

Også idrettshallar og symjehallar skal haldast stengt.

Skjenkestader, restaurantar, kafear, kantiner og andre serveringsstader skal stengje seinast klokka 22, og skjenking stoppar frå klokka 21.30.

Talet som kan samlast i private sammenkomster, blir redusert frå ti til fem personar inkluderte dei som bur i husstanden. Familiar på meir enn fem er unnatekne, og kohortar for barn i barnehage og skule er òg unnatekne. Ein må føre gjestelister på lik linje som offentlege arrangørar.

Arrangement på offentleg stad skal ha faste sitteplassar, og det er ikkje lov med fleire enn 20 deltakarar til stades. Gravferder er unnatekne. Der kan ein vere inntil 50 personar.

Arrangement utan faste sitteplassar er forbodne.

Valhammer vedgår at tiltaka er urettferdige, men at liv og helse må komme først.

– Desse tiltaka er urettferdige. Dei rammar alle, men dei rammar nokre ekstra hardt, seier Valhammer.

Den nye forskrifta gjeld frå laurdag fram til måndag 23. november i første omgang.