Berekraftig julefeiring
Konseptet med ein dag for byting av leiker blei prøvd for fyrste gong i Norheimsund denne veka.
Ein kunne levera inn leiker på biblioteket måndag, tysdag og onsdag og få inntil tre bytelappar. Desse lappane kunne brukast til å byta til seg «nye» leiker torsdag ettermiddag. Dette er ein del av Kvam si berekraftsveke, som har som mål at kvemmingar skal redusera forbruket og auka gjenbruk.
Juletida er ofte ei stor utgift for mange, og forbruket kan bli ganske høgt. Difor har det no kome ei smart løysing for å gjera feiringa litt meir miljøvenleg og rimeleg – ein leikebytedag. Ideen er at foreldre og born kan ta med gamle leiker og byte dei i noko nytt, for dei i alle fall, heilt gratis.
– Me hadde høyrt om andre som gjorde noko liknande før, eg trur det var i ein annan by, og det blei stor suksess. Så me tenkte: «Kvifor ikkje prøva det her òg? seier biblioteksjef Ragna Helene Soldal i Kvam herad.
Tanken bak leikebytedagen er enkel. I staden for at gamle leiker ligg og samlar støv på loftet eller berre blir kasta, kan dei få eit nytt liv hjå andre. Mange av leikene er framleis i god stand, og det er jo synd viss dei berre skal liggja og ikkje bli brukte. Dette er ein fin måte å få folk til å tenkja litt meir på gjenbruk, fortel Soldal
Dei tilsette var litt bekymra for at det kunne bli rotete med mange born springande rundt.
– Me tenkte det kanskje kunne bli kaos, men heldigvis har det gått ganske greitt. Sjølvsagt er det ikkje heilt roleg, men det er jo born, så me må nesten forventa litt bråk, seier Soldal.
Leikebytedagen kan og vera med på å gjera jula litt meir miljøvenleg.
– Foreldre kan gje vekk leiker borna ikkje lenger brukar og byta til seg noko nytt til dei. Kanskje ein slepp å bruka mykje pengar på dyre, nye leiker, og borna blir like glade uansett. Det er både billeg og bra for miljøet, seier arrangøren.
Journalistane som har skrive artikkelen, er mediefagelevar på Framnes Kristne Vidaregåande Skule. Red.
